Shillong, Iaiong 27: ka jingshah pynkynriah noh jong u Arun kumar Kemphavi kum u Deputy Commissioner jong ka West Khasi Hills District kala pynlong ia kiba bun ki briew na West Khasi Hills District ba kin pynpa ia ka jingsngewsih ka jong ki namar ki iohi ia ka jinglong u ba kloi ban trei na ka bynta ka roi ka par jong ki paidbah hapoh jong ka District.
U Arun Kumar Kemphavi, u la ioh ba bat kum u Deputy Commissioner jong ka West Khasi Hills District tang 14 bnai bad ha kine ki 14 bnai u la lah ban pyni ia ki kam kiba kum u Deputy Commissioner u la leh na ka bynta jong ka District.
Kumba ka paw na ka jingkynthoh jong ki briew mynta ka miet hapoh jong ka FB Deoyty Commissioner Nongstoin, kiba bun kila pynpaw ia ka jingsngewsih ka jong ki halor kane ka jingshah pynkynriah kam khlem pat dei ka por.
Ban shu pynkynmaw ba dang ha kane ka dorbar mang tyngka kaba la dep, u myntri rangbah u Conrad Sangma u la jubab hapoh ka iing dorbar ba kat kum ka service rule ki ophisar ki dei ban don palat ia ka lai snem ha ka juh ka jaka trei kam, lait sa tang da kumno eh lah ban pynneh bad sa tang da kumne eh hap ban pynkynriah ia ki ophisar na ka kam.
