Shillong, Risaw 12: Ia ka mat bym don jingshaniah shuh ia ka Executive Committee kaba la ialam da u bah Pynshngianlang Syiem hapoh jong ka KHADC kaba la leit rah da u Bah Adelbert Nongrum jong ka KHNAM kala shah kyntait hapoh ka iing dorbar na ka daw ba ki MDC ki duna kiba kyrshah ia ka.
Mynta ka sngi ki liang pyrshah hapoh jong ka KHADC kila pynpawshai ba kim ia tylli kawei namar ki MDC jong ka seng Congress kim shym la kyrshan ia ka mat bym don jingshaniah shuh kaba la wanrah da ki seng riewlum, Ban pdiang ka ka mat bym don jingshaniah shuh don phra ngut ki MDC ban ieng hapoh iing dorbar.
Haba u Chairman jong ka iing dorbar u Bah L G Nongsiej u la pyntip hapoh jong ka iing dorbar ba u Bah Adelbert Nongrum MDC jong ka KHNAM u la wan rah ia ka mat bym don jingshaniah shuh ia ka EC, na ka liang jong u Chairman u la pan jingbit na ka iing ba kito ki MDC kiba kyrshan kin ieng hala ki jong ki jaka, hynrei kiba ieng ki long tang hynriew ngut, na lor u bah Adelbert Nongrum u ba wanrah ia kane ka mat, kiwei kiba la ieng ki long ka kong Telenia Thangkhiew, Bah Samlin Mallangniang na ka HSPDP, Bah Donkupar Sumer, Bah Teinwell Dkhar bad ka kong Rona Khymdeit.
Ha dien ba u Chairman u la niew khlieh katno ngut kiba kyrshan ia kane ka mat bym don jingshaniah shuh ia ka EC u la shem ba ki duna kim shym ioh ia ka jingdon ki MDC katkum ki kydon jong ka rule pyniaid iing dorbar, na ka liang jong u Chairman u la pynbna ia kane ka mat bym don jingshaniah shuh la kyntait.
Ki MDC jong kaseng Congress kiba don hapoh ka iing dorbar ha kane ka por kim shym la treh ban ieng ban ai ka jingkyrshan, Ia kane ka mat bym don jingshaniah shuh ia ka EC la leit rah mynta ka sngi da u Bah Adelbert Nongrum shuwa ban sdang ka iing dorbar.
