Bym ioh jaka thiah pang ki trai jylla leit ia kynduh ka KSU ia u Dr Noor MS ka NEIGRIHMS

Shillong, Kyllalyngkot 15: Ka Khasi Students’ Union hapoh ka jingialam u samla Donald V Thabah general secretary, samla Shemphang L. Mawphlang vice president bad u samla Sonstar Nongkhlaw assistant general secretary ki la leit ban ia kynduh ia u Medical Superintendent jong ka NEIGRIHMS, u Dr. Noor Topno mynta ka sngi.

Ka jingiakynduh ka long halor ka jingioh jingujor ka seng ba bun ki nongpang trai ri trai muluk kiba wad jaka thiah ha kane ka hospital ki kham jynjar ban ioh hynrei kiba nabar khamtam na Assam kim ju don jingeh ban ioh jaka thiah pang.

Ka seng halor kane ka mat ka la kyntu ia u Medical superintendent ba un shim khia ba da lei lei ruh ki nongpang trai ri kim dei ban duh jaka thiah tang na ka bynta ban pynbiang ia ki nongpang bar jylla.

Ka seng ka pynsngew ruh ba namar ba kane ka hospital ka don ha jylla Meghalaya kumta ka dei ban pynbiang shwa ia ki trai ri trai muluk hashwa ban pynbiang ia kiwei.

U u Dr. Noor Topno medical superintendent u la kular hakhmat kine ki nongialam ba un sa shim khia ia kane ka jingujor.

Ha ka juh ka por la ong ba na ka liang ka jong u un ialeh ban pynthikna ba ki nongpang kiba dei na ka jylla kin ym duh jaka thiah bad lada ka don kano kano ka jingshah leh shiliang ki briew ki lah ban ujor beit ha u, kane ka long katkum ka kyrwoh kaba la phah da u bah Rapborlang Nongrum nongai ktien ka KSU.

What Next?

Recent Articles

Leave a Reply

Submit Comment

*