Shillong, K.Lyngkot 17: U Bah Adelbert Nongrum MLA jong ka 17-North Shillong mynta ka sngi u la sdang ia ka jingiakhih kaba san sngi ban shong kyllain mungor ha Malki ban pynpaw ia ka jingpyrshah halor ka jingbym jubab jong u myntri rangbah ka jylla ia ka dorkhas kaba u la ai ha ka 12 tarik mynta u bnai ha iing sah.
Haba kren ha lo lat pathai khubor u bah Adelbert u la ong ba ki san tylli ki mat jingdawa kiba u la rah sha u myntri rangbah ka jylla kim dei shuh kiba thymmai, u la rah ia ki hapoh ka iing dorbar naduh u snem 2018 mar ia jop kum u MLA na 17-North Shillong Assembly Konstitwensi.
Ki san tylli ki mat kiba u MLA ka 17-North Shillong u la ai sha u myntri rangbah ka jylla ba un jubab hapoh san ngi ki long, ban bishar bniah biang ia ka polsi ioh kam ioh jam ha kane ka jylla, khlem da ktah ia ka ioh kam hynrei ban peit bniah ha kaba leit ban pule sha ki kyrdan kiba kham shalor.
Ka sorkar ka dei ban kyntiew ia ka rta ioh kam ioh jam hapoh ki tnad sorkar bapher bapher kiba dei jong ka sorkar Meghalaya, namar kane ka khangdam kaba la don mynta ar snem kala ktah ia ki samla ioh kam ioh jam ha ka jylla.
Kiwei ki mat kiba don kam ka long ba ka dei ban don noh ia ka kynhun kaba la ka jong ha kaba ia dei bad ka kam IAS bad IPS, IFS ia kane dei ban phiah noh na ka jylla Assam, ia kane la don kam ban don la ka jong ka kynhun.
Dei ban pynkynriah ia ki briew kiba sah ha Them metor ka sorkar ka dei ban shimkhia kum ba kala kren, haba ia dei bad ka kam pud kam sam la dei ban wanrah ia ka rai hapoh ka iing Dorbar ban shim ia ka rai ha kaba ia dei bad ka jingiapynbeit pud bad ka Assam.
U Bah Adelbert u la ong ba kaei kaba u la pynkhreh ka long ba kane ka jingshong kyllain mungor ha madan Malki kan sdang mynta ka sngi haduh ka 22 tarik mynta u bnai por 10 baje mynstep, lada u myntri rangbah ka jylla um jubab ia kaei kaba u la dep ban thoh ha kane ka sngi la synran lang ia u da ki nongkyrshan ka party KHNAM.
