Shillong, Naitung 17: Ka seng Hyniewtrep Youth Council (HYC) mynta ka sngi kala pynlong ia ka jingiaid paidbah na Dinam hall sha State Central Library ha kaba kila pynlong ia ka jingiakhih shong kyllain mungor ban dawa na ka sorkar ba ka dei ban pyntrei kam noh ia ka Inner Line Permit (ILP) hapoh ka jylla.
Ha kane ka jingiaid paidbah da ki spah ngut ki dkhot jong ka seng HYC na kylleng ka Ri Khasi kila ia poi ha kane ka sngi ban ia shim bynta ha kane ka jingiakhih shong kyllain mungor ha state Central Library hapdeng ka jingpahra jur jong ki pulit ka jylla.
Ha kaj ingkren jong u Bah Peter J Lawai president ka seng HYC, u la ong ba haduh mynta ki paidbah kim pat lah ban kam trai ia ka khyndew ka shyiap, namar kam pat biang ban don ia ka pata na ki rangbah shnong ka District Council khlem da register ia ki khyndew hapoh ka ophis jong ki Deputy Commissioner.
U Bah Robert J Kharjahrin General Secretary ula ong ba kane ka jingialum jong ki jan jong u Mot Tirot Sing ka long ban kynmaw burom ia uen u syiem ba khraw u bala iakhun pyrshah ia ki phareng ha katei ka por, hynrei mynta ka jingiakhun ka long pyrshah ia la ki jong ki briew kaba kila jied ban long ki nongmih khmat.
Ka jingiakhun kaba ki ia khun mynta ka long ban iada na ka jingshah wan tyllep jong kiwei pat ki jaid bynriew bad kata ka long lyngba jong ka ki ain bad kaba bha tam eh ban iada ka dei ka ILP, ka seng ka dawa na ka sorkar ba dei ban pyntrei kam ia ka ILP ha ka jylla kam don jingeh lada ka sorkar ka pyntrei kam ia ka ILP lada ki mon ba ia leh pyrshah ia kane ka jingwan tuid jong ki briew kiba na bar.
Haba ia dei bad ka kam Uranium ka seng na duh ba sdang ka pyrshah ia kane bad mynta ka jingpyrshah jong ki ka long ia ka lynti rel ban wan sha ki bynta jong ka Ri Khasi, la ong ba lada pyntrei kam ia ka lynti rel ha kane ka jylla shen kum ki trai shnong ynsa kylla rit paid. Namar ba ka sorkar kala kyntait ban khot ia Karen ia ka seng ka seng mynta ka khot kylla ia ka kynhun myntri jong u Dr Mukul ba kin wan ban ia kren ha ka 22 tarik mynta u bnai ha Khasi National Dorbar Hall.
