Shillong, Kyllalyngkot 21: Mynta ka sngi ki pulit escort jong u Bah HDR Lyngdoh myntri kam poh iing ka jylla, u ASBI, u K Gobin Singh bad u LNK/303 Bah Talainbor Syiemiong kila ujor pyrshah da ka First Information Report pyrshah ia u nongniah jong ka kali number ML05-M-8336 ka kali Alto 800 Tourist Taxi ia kaba la niah da u Bah Mintra Kurbah.
Katkum ka ejahar kaba la ai da kine ki pulit ar ngut mynta ka sngi kila ong ba ha ka 19.01.2018 ha ka por 8.30 baje mynmiet katba ki dang don ha ka kam ban syran ia u myntri kam poh iing ha ka shnong Weilyngkut khappud bad ka shnong Dira, katei ka kali kaba la kdew haneng kala iaid sted haduh katta katta bad kala ima ka jingpynher sted. Na ka liang jong ki pulit kila phah pynsangeh ia kane ka kali.
Haba kila pynsangeh ia kane kali la shem ba u nongniah bad kiwei pat kiba don hapoh kali kila buid, une u nongniah ia katei ka kali u Bah Mintra Kurbah u la tur da ka jingthmu ban leh ei ei ia ki kali sorkar kiba don ha katei ka jaka kaba ki dang ap ia u myntri kam poh iing.
Ha kane ka ejahar kaba kitei ki pulit ar ngut ki pulit kiba la ai sha Sohiong Police station mynta ka sngi kila dawa ba ki bor jong ka ain ki dei ban leh ei ei ia u tei u draibar katkum ka ain.
