Da ka jingiakhih iaid paidbah kin pynlong ki nonghikai SSA ban dawa ia ka tulop

Shillong, Nohprah 07: Ki nonghikai SSA hapoh ka Jylla kin sdang iakhih da kaba pynlong da ka Jingiaiaid Paidbah ha ka 12 tarik mynta u bnai ha nongbah Shillong ka ban sdang naduh na madan phutball Nongthymmai shaduh Additional Secretariat Parking Lot naduh ka por 11 baje mynstep  haduh 2;30 janmiet.

Ia kane ka rai ban iakhih la shim hadien ba ka Sorkar Jylla kam pat pynlait satia ia ka arrear ba phra bnai jong ka snem mang tyngka 2016-17 kaba dang sah  naduh ka 1 tarik Naitung 2016 haduh ka 28 tarik Rymphang 2017 bad saw bnai ka tulop naduh u Nailar haduh u Naiwieng mynta u snem jong 12481 ngut ki nonghikai SSA kaba ka jingaipor ia ka Sorkar Jylla kala kut noh mynta ka sngi, ong u Bah Aristotle C. Rymbai President ka Meghalaya SSA School Association Seng Kmie.

Ka Synjuk ha ka taiew bala dep ka la buh ruh ia ka appointment ban iakynduh ia u Chief Minister Dr Mukul Sangma ban iakren halor katei ka bynta hynrei na ka liang jong u Chief Minister u khlem jubab, bynrap shuh shuh u Bah Rymbai.

Kumta ka Synjuk ka kyrpad ia baroh ki nonghikai SSA hapoh ka Jylla ban ia mih ryntih kumba la iarailang ha katei ka sngi. Kan don ka jingiakynduhlang shwa ha madam phutball Nongthymmai ha ka por 9 baje mynstep shwa ban sdang ka jingiaiaid Paitbah.

What Next?

Recent Articles

Leave a Reply

Submit Comment
*