Shillong, Risaw 28: U bah Roipar Kharraswai president jong ka Meghalaya EMRI Workers Union (MEMRIWU) mynta ka sngi u la pynbna ba haduh la shai ka sngi kin pynjur ia ka jingiakhih jong ki da kaba shah thgnan khlem por ban pynbor ia ka sorkar ba ka dei ban weng noh ia ka kompeni GVK kaba pyniaid ia ki kali Ambulance 108 ha kane ka jylla Meghalaya.
Haba kren ha ki lad pathai khubor mynta ka sngi ha Shillong Press Club, u Bah Kharraswai u la ong ba kum ka seng kam ban se ban shim ia kane ka sien jam kaba kham tyngeh namar kane ka sorkar kam shym la shim khia, ha ka jaka ban weng ia ki jingeh ki ia niat mar kylliang ha pdeng ka GVK bad ka sorkar, ka sorkar kam lah ban thet kti ia kane ka jingeh.
La iathuh ba ka jingiakhih ban shah thgnan khlem buh pork an sdang la shai ka sngi ha ka por 10 baje mynstep ha khmat ophis jong ka GVK kaba don ha Lawmali, ia kane ka jingshah thang yn wan lang ki dkhot jong ka FKJGP bad kum juh na ka KSU ki ban ia shah thngan lang bad ki.
Kum ka MEMRIWU ka pyrshah jur ia ka jingkren jong u myntri ka koit ka khiah kumba la paw ha ki lad pathai khubor ban ai por biang ia ka GVK ba kan pynbeit ia kane ka kam hapoh ar bnai, ka jingkylli ka long ar bnai kila dep ban ai por ha ka High Level Committee kaba la thaw da ka sorkar, mynta ka jingiakhih kala iaid shibnai hato ka sorkar kam lah ban pynbeit ia kane ka jingeh.
Na ka liang jong ki nongtrei ki kyrshan ia ka jingdawa jong ki seng bhalang ba dei ban phah tohkit ha kaba ia dei bad kane ka kam jong ka GVK, namar ki kali ki don 43 tylli katba ka jingkam sha ka sorkar haba ka phah ia ki kaiphot ki long 48 tylli shaei kito ki san tylli.
La ong ba ka jingiakhih jong ki ka long na ka bynta ka jingmyntoi jong ki paidbah bad ha ka juh ka por kum ki nongtrei ruh kin hap ban ioh ia la ka jong ka biangnong kaba ki trei ym ban niom ia ki katba ki sngewbit, kumba la ong ba kim hap hapoh jong ka “Labour Law”, lane ka katta ka “Minimum Wages” lada kim hap hangta te ha ka ain aiu kin hap.
