Shillong, Jylliew 5: Ka ophis jong ka Deputy Commissioner jong ka Ri Bhoi District kala pynlong ia ka jingrakhe ia ka jingdap 26 snem jong ka Ri Bhoi District ha District Auditorium Hall Nongpoh. Ha kaba ki MLA bad ki rangbah shnong na ka District kila poi ban ia shim bynta lang ha kane ka jingleh burom.
Ha ka jingkren jong u Bah Mayralborn Syiem MLA jong ka Nongpoh u la ai ka jingiaroh ia ki bor jong ka District kaba la pynlong ia kane ka jingrakhe. Ha kane ka sngi u la pynkynmaw ia ka jingangnud jong u Phadar Sylvanus Sngi Lyngdoh bam kwai ha dwar u blei, u Dr DD Lapang ha kaba la lah ban pynrulong ia ka jingangnud ka jong ki ban don ia ka Ri Bhoi District.
U Bah Mayralborn Syiem MLA jong ka Nongpoh u la ong ba ka Ri Bhoi ka dei ka jaka ba riew spah ha ka riti dustur, dei tang ka Ri Bhoi District kaba pynmih shibun u ksai muka bad ksai ryndia, ki soh ba bun jaid, ka District ka don ruh ia ki jaka jngohkai na liang jong u MLA u la kyntu ia ki paidbah ban ia treilang bad ka sorkar ban kyntiew ia ka District.
Ha ka jingkren jong u Bah George B Lyngdoh MLA jong ka Umroi, u la ong ba to ngin ia peit ia kaei kaba la dep ban leh bad ia kaei kaba dang don kam kaba hap ban leh, ha ka liang ka pule puthi, ka koit ka khiah, ka rep ka riang, Don kam ban ia treilag ki syiem, rangbah shnong ki briew sorkar ki MLA ban kyntiew ia ka ioh ka kot jong ki paidbah.
Ha ka jingkren u MLA jong ka Umsning u Bah Jason S Nawlong u la ong ba ka Ri Bhoi District ka dei ka District ba don ka jingshong suk bad ia ka mynsiem jong ka jingialang kawei, u la kyntu ban don ia ka jingiatreilang na ka bynta ka roi ka par jong ka District.
U Bah S Sohtun MLA jong ka Jirang u la ong ba ka Ri Bhoi ka dei ka jaka ba sboh bha bad kumta ka long ba dei ban shim khia ha ka rep ka riang bad ban seng ia ki karkhana rit bad u la kyntu ia ki samla ba kim dei ban shaniah tang ha ki kam sorkar.
Ha ka jingkren jong ka Deputy Commissioner ka kong RM Kurbah ka la ong ba ym dei ban klet ia ka nongialam ba ha khmar kiba la trei shitom ban pynioh ia ka District kaba pura. Ha kane ka sngi la don lang ruh u Bah S Thamar SP jong ka District bad kiwei kiwei ki heh na ki ophis jong ka sorkar kidon ha ka District kila wan ban ia shim bynta ha kane ka jingrakhe.
