Shillong, Jymmang 13: Mynta ka sngi ka Retuning Officer jong ka 23-Sohiong Assembly Konstitwensi kala pynbna ba u bah Synshar Kupar Roy Lyngdoh Thabah kyrtong ka UDP u la jop da 3,422 vote pyrshah ia u kyrtong ka NPP u bah Samlin Malngiang.
U Bah Synshar Kupar Roy Lyngdoh Thabah ka UDP u la ioh 16,679 vote, bah Samlin Malngiang NPP u la ioh 13,257 vote, bah S Osborn Kharjana INC u la ioh 1,762 vote, bah Stodingstar Thabah AITC la ioh 89 vote, bah Sandondor Ryntathiang HSPDP u la ioh 62 vote, bah Seraph Eric Kharbuki BJP u la ioh 40 vote bad kiba thep NOTA 272 vote.
Da ka jingjop ka UDP mynta ka sngi ha 23-Sohiong (ST) Assembly Konstitwesni ka jingdon ki MLA ha kane ka sorkar MDA kaba la ialam da ka NPP ka la kiew sha ka 46 ngut ha ka iing dorbar kaba 60 ngut, ka NPP 28, UDP 12, HSPDP 2, BJP 2, Independent 2.
U nongialam jong ka UDP u bah Titosstarwell Chyne CEM jong ka KHADC u la kren shai ba ka jingiatreilang ha ka sorkar kan long kum juh, u la ai khublei ia ki paidbah ka Sohiong Kinstitwensi kiba lai ia ka jingshnaniah ha ka party UDP da kaba pynjop ia u kyrtong ka party.
