Shillong, Lber 25: Ka kynhun shipai jong ka 101 kaba don ha Shillong kala pynlong ia ka jingpyninam ia ki tiar siat kaba lai sngi ha madan polo na ka bynta ki paidbah ba kin ioh ban leit peit ia ki ha katei ka jaka kum ka jingrakhe ia ka jingdap 50 snem jong ka jingjop thma pyrshah ia ka Pakistan ha u snem 1971.
Ka jingjop thma jong ka Ri India ia ka Pakistan ha u snem 1971 ka long ka burom kaba khraw ia ka Ri India namar dei lyngba kane ka thma ba ia East Pakistan kala ioh ia kala ka jong ka Ri ia kaba la tip kum ka Ri Bangladesh mynta.
Kane ka thma kala dap 50 snem mynta ha kaba ka kynhun shipai jong ka Ri India ka leh burom ia kane ka jingjop thma pyrshah ia ka Pakistan bad dei ki shipai na 101 kiba la ioh ban iuhkjat nyngkong hapoh Decca ha kato kaba por ba la tip mynta kum ka Dhaka.
Ha kane ka sngi ki dkhot jong ki NCC na kylleng ki bynta jong kane ka nongbah Shillong kila leit sha tei ka jaka ban peit ia ki tiar siat kiba la buh da ki shipai ban pyni sha ki paidbah, ha kane ka sngi ki riew paidbah ruh kila bun bha kila leit jngoh ia ki tiar siat ba pyninam ki shipai.
