Da ka Mini Stadium yn tei ha ka shnong Jatah Lakdong, kular u bah Banteidor

Shillong, Lber 12: Ka Mawkynrew Cup Committee (MCC) ha ka 10th March 2018 kala pynlong ia ka Felicitation Programme bad kumjuh ruh ia ka jingsam Prize sha ki ar tylli ki kynhun kiba la poi sha ka Final ha ka 1st Mawkynrew Cup ha ka jingialang kaba iphuh iphieng ia kaba la pynlong ha Madan Shnong jong ka Jatah Lakadong ha kaba la wan da sakhi da ki hajar ngut ki paidbah na ki shong bapher bapher kiba hap hapoh jong ka Mawkynrew Constituency bad kumjuh ruh na ki shnong ba marjan.

Na ka liang jong ka Mawkynrew Cup Committee (MCC) ha katei ka sngi kala sam ia ka khusnam nongjop sha ka kynhun ialehkai jong ka Nohron FC kaba long ka kynhun kaba la iohrah ia ka Nam Lahduh ha ka 1st Mawkynrew Cup kaba la iohrah ia ka song tyngka kaba Rs.1,20,000/- (Shi Lak Arphew hajar Tyngka) lem bad ka trophy katba ka kynhun ialehkai na ka Dienglieng Sports Club kaba la shah jop ha ka Final kala iohrah ia ka song tyngka kaba long Rs. 60,000/- (Hynriew Phew Hajar Tyngka) lem bad ka trophy.

La sam ruh ia ki khusnam bapher bapher kiba kynthup ia ka Nam Man of the Match sha u Samla Ontis War (Nohron FC), Best Goal Keeper sha u Samla Donaldson Lyting (Nohron FC), Top Scorer sha u samla Shahlem Lynshiang (Nohron FC) da ka song Tyngka kaba long mar Rs.1,000/- (Shi Hajar Tyngka) lem bad ka trophy, katba ia ka nam Discipline Team la iohrah da ka Mawpyrshong Sports Club da ka song Tyngka kaba long Rs.1,500/- (Shi Hajar San Spah Tyngka) lem bad ka trophy bad kumjuh ruh ia ka Best Match Pass la iohrah hi da ka kynhun jong ka Mawpyrshong Sports Club kaba la iohrah ia ka song Tyngka kaba long Rs. 10,000/- (Shiphew Hajar Tyngka).

Ha katei ka sngi na ka liang jong ka Mawkynrew Cup Committee (MCC) kala pynkup burom kyrpang ia U Bah Banteidor Lyngdoh (Bah Pai) Advisor jong ka MCC uba long baroh shi katta u MDC Mawkynrew Constituency hynrei uba la long pat mynta u MLA bad uba long ruh ha kajuh ka por u Myntri sorkar ba dei khmih ia ka Sports & Youth Affairs ha ka sorkar Meghalaya Democratic Alliance uba la long kum u Kongsan ha katei ka sngi.

Haba kren ha ka jingialang kum u Kongsan na ka liang jong u Bah Banteidor Lyngdoh (Bah Pai) u la ai khublei ia baroh ki nongkitkam jong ka Mawkynrew Cup Committee (MCC)  kiba la ia trei shitom miet la bad sngi ban pyntyllun ia ka jingialehkai wat hapdeng jong ki ba bun ki dieng pynkiang bad ki jingtynjuh ba ki iakynduh hynrei kiba la lah pat ban pynlong ia ka programme kaba jop bad kaba iaid beit iaid ryntih. Na ka liang jong u kongsan u la pynpaw ia ka jing sngew nguh kaba khraw shi katdei eh khamtam ia ki baroh ki Paidbah jong ka Mawkynrew Constituency kiba la pynioh ha u ia ka jing jop kaba donburom ha ka Election MLA kaba dang shu dep shen ha kaba u la ong ruh ba “Kane ka jingjop jong u kum u MLA ka Mawkynrew Constituency, kam dei ka jingjop jong u shimet hynrei ka dei ka jingjop jong u khun u hajar jong ki paidbah ka Mawkynrew Constituency”.

Shuh shuh na ka liang jong u Bah Banteidor Lyngdoh (Bah Pai) u la ai khublei kyrpang ruh ia ki paidbah kiba dei ki Nongkyrshan jong kiwei pat ki Seng Sain Pyrthei bad jong ki kyrtong bapher bapher ki bym shym la kyrshan ia u ha kane ka Election bala dep ha kaba u la khot ia ka jing iatreilang nangne shakhmat na ka bynta ka bit ka biang jong ki Paidbah Nong Shong Shnong namar u la ong ba mynta u la dei u Nongmihkhmat jong baroh. Ha ka bynta kaba khatduh jong ka jingkren na ka liang jong u Kongsan kaba la sawa jam da ka jing thapkti na ki Piadbah kala sawa hadien ba na ka liang jong u Bah Banteidor Lyngdoh (Bah Pai) u la pynbna paidbah bad kular ban shna noh da ka Mini Stadium ha madan football jong ka Shnong Jatah Lakadong.

La pynshongshit shuh shuh ia katei ka jingialang da ka jing iashimbynta lyngba ki Cultural Programmed a ki khynnah Skul jong ka Jatah Lakadong School, Special dance na ka kynhun Young Geberation, Band Song na ka kynhun jong ka Shnong Syntung. Ha katei ka sngi la sakhi ruh ia ka jingialehkai Friendly Match hapdeng ka Nonghukew SC bad ka Umtong SC ha kaba ym don ba jop satia hynrei  na ka liang ka MCC ki ai ia ka prize money ia ki mar Rs.5,000/- (San Hajar Tyngka). Ia ka jingialang ha katei aka sngi la pyniaid da I Bah Shrenly Khriam, I kong Amanda Pakyntein, Cahirperson MCC iba dei ruh I kurim jong U Bah Bah Banteidor Lyngdoh (Bah Pai), Kiwei pat kiba la ai jingkren ha katei ka sngi ki kynthup ia U Bah Bah Tympang Pohshna, Chief Coordinator MCC, U Sordar jong ka Shnong Jatah Lakadong, Babu Daniel iba la ai ia ka jingduwai kaba kyrpang bad kumjuh ruh na I Kong Mem Sumarlin Wankhar, Head Management jong ka MCC.

What Next?

Recent Articles

Leave a Reply

Submit Comment

*