Shillong, Naitung 02: Ka seng Meghalaya SSA Schools Association (MSSASA) haka jingialang kaba la long ha ka sngi saitjain ha Khasi National Dorbar Hall kala shim ia ka rai ba kan leit ban ujor sha iing kashari pyrshah ia ka National Institute of Open Schooling (NIOS) namar ba kam lah ban pynbeit ia ka result kaba dap tang da ki jingbakla ha kaba ia dei bad ka Diploma in Elementary Education (D.EL.ED) Exams 2015 ka kynhun ba nyngkong 2013 wat ha dien ba kala pynmih ia ka result haduh lai sien ia ka juh ka eksam ia kaba la pynmih ha ka 22 tarik jong u bnai Jylliew mynta u snem.
Ia kane ka rai ban mudui sha iing kashari la shim ha ki ar tylli ki jingialang kiba la long ha ka 27 tarik u bnai Jylliew ha ka Jowai bad ha ka jingialang ha Shillong ha ka 1 tarik mynta u bnai ha kaba baroh ki nonghikai kiba la shah hikai ia ka D.El.Ed trainees, kine ki nonghikai kiba la ia kynduh ia kane ka jingeh ki hikai ha ki skul bapher bapher kyntup ia ki skul sorkar.
Ka MSSASA kala kdew ba ia ka result kaba la pynbna da ka NIOS ha ka 22 tarik u bnai Jylliew ruh kam long kaba beit ki don bun ki jingbakla ha kaba ai mark ia ki nonghikai wat la ki dei na ka juh ka jaka kaba ki leit ban shah hikai kum ka ha ka ‘Workshop Based Activities’ (WBA) bad ha ka rukom ai jinghikai ha kane ka bynta ka long kum juh kum haki result kiba la pynmih mynshuwa ia kaba kim lah ban pdiang.
U Presidentjong ka MSSASA u Bah Aristotle C. Rymbai, u la ong ba na ka liang jong ka seng kala ia kren ia kane ka kam bad u Chairman jong ka NIOS, ka myntri ba dei peit ia ka School Education bad Literacy, jong ka sorkar Meghalaya,ia ka myntri kaba dei peit ia ka Higher bad bad kum juh ia u myntri rangbah ka jylla bad ia u Union Minister jong ka ministry MHRD jong ka sorkar pdeng bad kila pyntip ruh ia kane sha ka ophis jong u myntri rangbah duh jong ka Ri India hynrei ka NIOS kam shym leh ei ei ban pynbeit.
Na ka liang jong ki nonghikai kila trei shitom ban pynlut ia ka pisa, ka bor ka por hynrei na ka liang jong ka NIOS kam shym leh ei ei bad na ka liang jong ki bor bahlor ruh kim shym la sngap bad kane ka jingleh ka long ka jingpynkhein ia ka hok ka jong ki nonghikai namar ba kam shym la lah ban pynmih ia ka result kaba biang wat ha dien shisnem hynniew bnai bad kila pynkhein ia la ki jong ki rule jong ka.
Ka seng kan ai ia ka Legal Notice sha u Chairman jong ka NIOS kaba don ha Noida ha UP, ia u Regional Director kaba don ha Guwahati bad Nodal officer kaba don ha Shillong bad kum juh ia ka u Director jong ka Directorate jong ka Educational Research bad Training (DERT) ka sorkar jylla Meghalaya bad lada kim lah ban jubab hapoh ka 14 sngi bad ha dien 14 sngi ka seng kan leit sha iing Kashari hapoh jong ka Meghalaya High Court ban ujor na ka bynta ba kin ioh ia ka result kaba biang bad ki bor kiba dei peit ia kane ai kin shim ia ka jingkit khlieh la ong u Bah HM Marbaniang General Secretary.
