Shillong, Naiwieng 15: U Bah Banteidor Lyngdoh, MLA ka Mawkynrew Constituency uba dei ruh u Myntri ba dei peit ia ka tnad Agriculture, ha ka sngi Saitjaiñ u la ia mir jingmut bad ki nongrep soh shan (Strawberry) ha Syntung, Mawkynrew Constituency kumno ban kyntiew ia une u jait jingrep nalor kiwei ki kam rep.
U Bah Banteidor u la kdew ba nalor kiwei ki kam rep kiba ki nongshong shnong ka Syntung bad ki thaiñ ba marjan ki shaniah na ka bynta ka jingim ba man la ka sngi donkam ban phai khmat sha kiwei ki jait jingrep kum u soh strawberry ban kyntiew ia ka ïoh ka kot ka kamai kajih jong ki.
U la ong ba ka thaiñ hi ka iahap bha ka jinglong jingman ka khyndew ka suinbneng ban rep ia une u soh strawberry uba dei u jait soh ba lah dor bha. “Ia mynta ki dang don tang katto katne ngut shwa kiba rep hynrei nga pynshlur ia kiwei ruh ba kin wan sha khmat ban shim ia kane ka jingrep soh strawberry kum kawei na ki lad ban kyntiew ia ka ïoh ka kot”, u la ong.
Dang shen u ne u Myntri Sorkar u la pynpoi ia ki tynrai symbai sohmrit khlaw (black pepper) sha ki nongrep ka thain khnang ba kin thaw lad pynmih pisa da kaba rep ia une u mar rep. “Ngi la ïoh mad ia u soh strawberry na kaba ki nongrep ka thaiñ ki la pynmih bad ngi lap ba u don ka jngmad kaba shngiam kaba kiba mlien ban bam ia une u soh ki la pynmynjur”, u la ong.
Da kaba khmih lynti ba ka jingrep soh strawberry kan nang iai roi ha ka thaiñ, u la ong, “Ngan iai kner ia ki kti kum u nongmihkhmat ban kyntiew ia ki nongrep bad khnang ba ki briew jong ngi kin ym shaniah eh tang ha uwei u jait jingrep na ka bynta ka ïoh ka kot hynrei kin phai khmat sha kiwei pat ki jait jingrep ba kin ïoh kamai kajih”.
U Bah Banteidor u la leit ban jngoh ia ki katto katne ki jaka rep soh strawberry ha katei ka thaiñ bad ia kren bad ki nongrep kiba la pynpaw ia ka jingai khublei ia une u Myntri u ba la lam lynti ia ki nongrep ha bun ki liang. Ia u Myntri la synran lang da ki nongkitkam ka PDF, u Chairman ka Mawkynrew C &RD Block, Bah T Pohshna, ki riewrangbah bad kiwei pat.
