Shillong, Naitung 27: Na ka daw jong ka jingjur jong u slap ha kine ki sngi ha Assam bad Meghalaya kala wanrah ia ka jingshlei um kaba jur ha Garo Hills ha kaba da ki hajar ngut ki briew kila hap ban mih na la ki jong ki iing ki sem ban leit sah sha ki jaka kiba la buh da ka sorkar.
U myntri rangbah ka jylla u Dr Mukul Sangma mynta ka sngi ryngkat ki MLA bad ki heh sorkar kila leit ban jngoh ia katei ka thain baroh kwei ban iohi da la ki jong ki khmat ia ka jingeh kaba ki paid bah ki ia kynduh, ki MLA jong ki constituency kiba shah ktah ha kane ka jingshlei um kila ia don lang, U Clment Marak myntri ba die peit ia ka bam ka dih, Assembly Speaker, A.T. Mondal u Parliamentary Secretary i/c Water Resources, Ashahel D. Shira bad u Deputy Commissioner Pravin Bakshi.
KI shnong kiba la shah ktah ha kane ka jingshlei kum ki long kum ka Phulbari, Rajabala, Singimari, Paham, Bhaitbari and Hallidayganj. Kat haduh ba thoh ia kane ka khubr ki briew kiba la lah ban pynkynriah ki haduh 247 tylli ki long iing bad kane la ong ba kan dang kiew ka jingpynkynriah ia ki long iing longsem namar ka um ruh ka dang kiew.
Ha kane ka sngi na ka liang jong u myntri rangbah u la pynbna ba ka sorkar ka dei ban ai bam ia dih ia ki briew na ka bynta shiphew sngi lynter haduh ba kin da lah ban leit phai biang sha ki iing ki sem lada jia ba kane ka jingshlei um kala jahnoh.
La btah ruh ba ki bor jong ki disitrict kin dang shimjingkhien ia ki jingduh ha kane ka jingshah lynshop ha ka mariang. La thaw ruh ia ka committee hapoh ka jingpeit lem jong u Speaker ban iarap ha kane ka kam ha ki ba bun ki liang.
