Shillong, Naitung 20: Ki paidbah jong ka 35-Ranikor Konstitwensi kila iohi ia ka jinglen lade jong u MLA jong ki u Martin M Danggo ha kaba u la hiar shuki na ka bynta ban pynioh ia ka Ranikor Civil Sub Division, ban myntoi u paidbah katei ka thain baroh kawei.
Ha dien ba la plie ia ka Ranikor Civil Sub Division da u symbut myntri rangbah ka sorkar jylla u Bah Prestone Tynsong, kala pynskhem ha khmat jong ki paidbah ba kaei kaba u MLA jong ki u leh ka dei na ka bynta ka jingmyntoi jong ki paidbah. Dei halor kane ka nongrim ba mynta da ki hajar ngut ki paidbah kila tyrwa ban rung sha ka NPP ban ai ka jingkyrshan ia u Martin M Danggo ha kane ka elekshon shiteng samoi ban pynjop don burom namar ki kam kiba u la leh.
U Bah Kitborlang Nongrem u wei na ki nongialam ba ha khmat jong u Martin M Danngo u la iathuh ba ki riew rangbah kiba la wan ban tyrwa ban pyniasoh sha ka NPP, ki dei na ka seng UDP, BJP, PDF bad ki ki dkhot jong ka seng NPP kiba la dep ban don lypa ki dang iai neh bad ka seng, kiba mih kumba la paw ha ki lad pathar khubor ki long tang katto katne ngut kiba juh pryrshah ia u MLA barim jong ka Ranikor.
Haba ia dei bad ka jingkren jong u Bah G G Bung, ha kaba u la ong ba kane ka elekshon shiteng samoi ka dei ka jingai khublei khatduh ia u Martin M Danggo, na ka liang jong u Bah Nongrem um sngew phylla shuh namar u tei u rangbah u la kren ia kine ki juh ka ktien haman ki elekshon bad wat ha general elelction mynta u snem 2018 ruh u la kren ia ktei ki juh ki kyntien, hynrei u Martin M Danggo u la dang kiew ha ka jingjop ka jong u ha kaba u la tam haduh 2002 vote ban ia nujor bad kiwei pat ki elekshon kiba la dep.
Halor ka jingkynnoh ia ka jingtlot u MLA, na ka liang jong u Bah Kitborlang Nongrem u la ong ba ki paidbah ka Ranikor Konsitwensi ki tip kham bha, dei na kane ka daw ba kila pynjop ia u haduh san sien lynter ha ka juh ka por u khot ia u Bah GG Bung u wei na ki riew rangbah ka thain ba un ia khun hi da lade ha kane ka elekshon shiteng samoi lada sngewthuh ba ma u u khmam khlain ban ia kiwei.
Na ka liang jong u Bah Kitborlang haba phai sha ki kyrtong kiba kwah ban ia khun ia kane ka MLA Elekshon shiteng samoi na ka 35-Ranikor Konstitwensi u ai ka jingkitbok namar ha ka synshar paidbah yn nym lah ban khang iano iano ruh kiba don ia ka jingthmu ban ia khun ia ka elekshon, la ka long ha ka MP, MLA lane MDC ruh kum juh.
