Shillong, Nailur 19: Ka seng samla pule ka Khasi Student’s Union (KSU) mynta ka sngi kala pynlong ia ka jingkhih shong kyllain mungor ha jan additional secretariat ban pynpaw pyrshah ia ka jingshah ban bein ki khasi kiba shong ha khappud bad ka jylla Assam khamtam eh ha ki bynta jongka Block II.
Kane ka jingiakhih ka long ruh ban pynrem ia ka sorkar halor ka jingbym lah jong ka ban ia da ia la ki jong ki briew na ka jingshah thohbor ha ka Assam na ka por sha ka por. Ha kane ka jingiakhih da ki spah ngut ki dkhot jong ka KSU kila ia poi sha kane ka jingiakhih shong kyllain mungor kaba la long mynta ka sngi.
Ha kane ka jingiakhih ki dkhot jong ka seng KSU kila rah la ki plakard bad ki jignthoh ban pynpaw ia ka jingsngewsih khamtam eh halor ka jingshah pyniap jong u wei na ki rangbah ka thain riad Nongtung u Bah Tyngshain Mukhin bad ki dawa ba u dei ban ioh ia ka jingbishar kaba hok.
Na ka liang jong ka KSU North Khasi Hills kala thoh ha ka jingthoh ban dawa ba ka sorkar ka dei ban pynbeit noh ia u pud u sam u ba la sah tengmynta la bun bun snem, kawei pat ka plakard kaba la rah da ki dkhot jong ka KSU ka thoh, “ko sorkar ai suloi ia ngi ban ia da ia u pud u sam”.
Ha kane ka jingiakhih kaba mynta ka sngi la thoh shai ruh ba ka riad Nongtung kam hap hapoh jong ka Block II, kawei pat ka jingthoh ka thoh ba “Ngin nym shong thait na ka bynta ka jaidbynriew ia kanela thoh da ka KSU Raid Nongtung. Ha kane ka jingiakhih la wan ban ia shim bynta da ki long kmie long kpa, ki samla kynthei bad shynrang.
