Shillong Jylliew 11: Da ki spah ngut ngut kynthei bad shynrang mynta ka sngi ki la pyllong ia ka jingiaid paidbah ban pynphriang ia ka jingsuk da kaba iaid jar jar na madan Malki da kaba tawiar ia ka Barik sha madan Mali biang, ban pynphriang ia ka khubor ban wanrah biang ia ka shong suk shong sain ha ka nongbah hadien ba la mih ka kynrum kynram na ka jingjia ha them Iewmawlong ha kine ki sngi.
Ia kane ka jingiaid paidbah la pyniaid da ka seng samla Malki, ba la wan iasnoh kti lang ki paidbah bad u rangbah shnong ka shnong Malki, u Bah HP Oflyn Dohling. Ia ka jingiaid tawiar kaba sdang na madan Malki sha Civil hospital Shillong sha Barik bad wan phai biang sha madan Malki.
Ka jingiaid paidbah ka long kaba jar jar ryngkat ka lama kaba thoh ba ka sorkar ka dei ban shim khia ban weng noh ia ki khar metor na them Iewmawlong khlem kano kano ka jingpyrta ne iarisa eiei.
U rangbah shnong ka Malki u Bah HP Oflyn Dohling u la ong ba ia kane ka jingiaid paidbah ban pynphriang ia ka khubor jingsuk ka dei ka jingpyrkhat jong ka seng samla Malki. Ha ka jingshisha la kwah ban pyllong kham mynshwa namar ba ioh kan poi sha ka jingeh ban tehlakam ia ki paidbah la pynlong noh haduh mynta, u la ong.
U la ong ba ka jingmut hi ka long ban kyntu ia ka sorkar ba kan thaw ia ki lad ki lynti ban pynkynriah noh ia ki khar metor na them Iewmawlong namar ba ka jingdon jongki, ha katei ka jaka ka la dei ka daw kaba la buh jingma ia ka iaid ka ieng jong ki briew.
U la ong ba kane ka mat ka dei kaba la slem bha naduh ki phew snem hynrei kiwei ki sorkar barim, kim shym la shim khia ia kane ka kam kaba la sahteng haduh mynta. La ong ba ki sorkar barim ki la phiel namar ha kine ki snem kiba la leit kam shym la leh ei ei halor kane ka jingeh watla ki la ioh ka por kaba biang kaba kylluid bha.
U la ong ba ki sorkar barim tang shu poi ha ka kam ha ka iing kashari ki la sngap noh khlem buddien eiei bad kane ka la pynsah teng haduh mynta. Hynrei ha kajuh ka por, u rangbah shnong u la ong ba ia mynta ym pat lah ban kren eiei ia kane ka sorkar kaba dang thymmai namar ba kaba kongsan ka long ba ka dei ban pyni da ki kam.
U la ong ba kumba la mad, katei ka thaiñ them Iewmawlong ba sah ki khar metor ka dei kawei kaba long kum ka ktem ka jingsniew ha kaba ki don ki kam ba laiphew jait. Na ka liang u rangbah shong ka Malki, u la ong ba ka sorkar ka dei ban pyllait noh ia kito ki briew kiba shah kem shah rah ha ki pulit ha ka jingiakhih ha kine ki sngi kloi katba lah namar ba ka jingsuk ka la wan phai biang.
