Shillong, Rymphang 01: Mynta ka sngi da ki spah ngut ki samla jong ka seng Congress kiba dei na North East kila leit ban tur sha iing sah jong u myntri kam poh iing ka sorkar pdeng u Rajnath Singh ban pynpaw ia ka jingpyrshah ia ka Citizenship Amendment Bill, 2016.
U President jong ka MPYC u Richard M Marak, ha ka kyrwoh kaba u la phah mynta ka sngi u la ong ba kum ka party kan ieng beit ban pyrshah ia kane ka bill jong ka sorkar BJP. Ia kane ka jingiaid paidbah la ialam da u president jong ka PYC ba ialam ia ki jylla ka NE ha kaba kila shah kem noh ynda ki poi ha Mandir Marg Police Station ha New Delhi.
U Marak u la ong ba kane ka Bill ka long pyrshah ia ka NRC ha Assam bad ia ka ia kane ka bill hap ban peit bha namar ka ktah ia ka jinglong jong ka Ri India pyrshah ia ka riti synshar kaba khlem don kano kano ka jingiahshah niam.
Haba phai sha ka jylla Meghalaya, u Richard u la ong ba ki Garo, Khasi bad ki Jaintia ki don ia la ka jong ka riti dustur , ka long kum juh ia ki paid riewlum jong ka dong shatei lam mih ngi jong ka Ri India kiba don ia ki jong ki Riti ki Dustur ba dei ban nang pynneh pynsah ia ki bad kiba dang dei ban pynkhlain shuh shuh ia ki ban pynneh ia la ka jong ka jaidbynriew.
Haba ia dei bad kane na ka liang jong u President jong ka MPYC u Marak u la ong ba kum ka seng kin ia leh pyrshah ia kane ka bill jong ka sorkar NDA haduh kaba kut, la ka long ha kano kano ka rukom ruh.
