Shillong, Nailar 13: Da ki spah ngut ki nongrep na ki shnong bad thain ba marjan ka Shnong Nongjrong bad Nohron ka Mawkynrew Constituency, ki la ioh pdiang ia u symbai jingthung sohmrit na kti u MLA ka thain, u Bah Banteidor Lyngdoh, uba dei ruh u Myntri ka tnad Agriculture ha ka jingiualang kaba la long ha Shnong Nohron ha ka sngi Palei.
Ki nongrep ka thain ki la sngew kyndit da ka jingkmen ba u MLA u la pynkhreh na ka bynta jong ki da ki symbai jingthung sohmrit uba lah dor bha ha iew ha hat bad kaba long ruh ka sien ba nyngkong ba kin ioh ia ki jingiarap na ka bynta ka rep ka riang da u sohmrit.
“Ngi ai khublei ia u MLA uba la wanrah ban ai ia ngi da ki symbia sohmrit kiba ia dei iahap bad ka jaka ka thain jong ngi bad ba ngin lah ban kyntiew shuh shuh ia ka ioh ka kot na ka kam rep kam riang”, la pynpaw ki nongrep da ka jingkmen.
U MLA u la wanrah haduh 4000 tynrai ki symbai jingthung sohmrit ha kaba da ki spah ngut ki nongrep ki la ioh pdiang ia kane ka jingiarap na u MLA. Ki thain ba marjan bad kine ki shnong ki la long lypa ki jaka ba mih bha u soh u pai nalor kiwei pat ki jait jingrep bad lyngba ka jingrep sohmrit kan nang iarap shuh shuh ia ki nongrep.
Kiba la ia donlang ha kane ka sngi nalor u Bah Banteidor ki long u Chairman ka Mawkynrew C&RD Block, u Bah T Pohshna, u Sordar ka Shnong Nohron, u Bah C Nongrum, ki nongialam ka PDF Mawkynrew, ki riewrangbah lem ki nongioh jingmyntoi na u MLA.
U Bah Banteidor u la ong ba ka long kaba donkam ba ki nongrep ka thain kin phai khmat da kiwei ki mar rep khang ba kan iarap shuh ia ka ioh ka kot jong ki. “Ngi sngewthuh ba ka Sorkar ka iarap bad phai khmat sha ki nongrep hynrei donkam ki nongialam lynti ban wanrah ia ki lad jingiarap”, u la ong.
“Kum u MLA nga kwah ba ki nongshong shnong kin kiew ha ka kami kajih bad roi ha ki kam ki jam khnang bad kumjuh ban kyntiew ia ka roi ka por na ka bynta ka bit ka biang ki paidbah”, u la ong. Na ka liang u MLA u la kit-bok kit-rwiang ia ki nongshong bad khmih lynti ba kiei kiei ki jingmyntoi ba ki ioh kin long ka jingkyrkhu ia ki.
