Shillong, Lber 25: Mynta ka sngi ki paidbah jong kane ka nongbah Shillong, khatam kito ki trei kum ka tnad ka koit ka khiah, ka MeECL, Municipal, PHE, PWD bad ki lat pathai khubor kila leit ban pan curfew pass na ophis jong ka Deputy Commissioner jong ka East Khasi Hills District.
Mynta ka sngi la iohi ba ki paidbah kila hap ban ieng da u lain ban ai ia ki aplikoshon jong ki katkum ka jingdon kam jong ki ban ioh ia ka korphiew pass bad kumjuh iaki pass na ka bynta ki kali kiba pyndon kam da ki tnad ophis kiba hap ban leit trei.
Na ka liang jong ki paidbah kiba la leit ban pan ia ki pass, kila ia ap ha katei ka jaka haduh ban da ioh ia ka pass namar kine ki briew kiba pan pass kila hap ban leit trei ha kine ki sngi ba don kane ka korphiew ha kane ka nongbah Shillong. Na ka liang jong ka ophis ruh kila ia leh ban pynkloi ban ai ia ki pass katkum ka jingdon kam ki paidbah.
Kane ka jingpan korphiew pass kam dei tang ia kito kiba dei na ki tnad sorkar, hynrei kila don ruh ki riew shimet kum ki trai dukan die dawai kila leit ban pan ia ka korphiew pass ban suk ka leit ka wan ha kine ki sngi ba don korphiew.
