Shillong, Nailur 13: U Secretary ka tnad ka koit ka khiah jong ka sorkar Meghalaya u P Bakshi u la ong ba, dang hap ban pynshisha ka dei ne em ka jingpang Rubela kaba la lap ha Mawphlang PHC.
Kane ka jubab jong u Secretary ka tnad ka koit ka khiah ka long haba la kylli hato ka dei ka jingshisha ne em ba ia ka jingpang Rubela ha kane ka jylla Meghalaya la lap ha Mawphlang PHC, ha kaba u Secretary ym shym la ai ka jubab kaba shai ban ong hooid ne em, hynrei u la ong ba dang hap ban pynshisha.
Hynrei kaba pynlyngoh ka long ba na ka liang jong ka tnad ka koit ka khiah ha kine ki sngi kala phah ia ki briew jong ka sha ki skul bad ki shnong thaw ba pynshai paidbah shuwa ban sdang ia kane ka jingpyndih dawai Measles Rubela ha ka 24 tarik mynta u bnai kaba dei ka programme jong ka sorkar pdeng.
U Secretary u la ong ba ha kane ka jylla Meghalaya kin sdangia kane ka jingpyndih ia kane ka dawai sha ki khynnah naduh ka rta kaba khyndai bnai haduh ka rta khatsan snem. Katkum ka jingkhien kaba la ioh ka jylla Meghalaya ka don 13 lak ngut ki briew ha kane ka rta ia kaba ki hap ban pyndih ia kane ka dawai.
