Shillong, K.Lyngkot 28: Ka JHADC haduh mynta ka dang pynsah ia ka tulop jong ki nongtrei khlem pat siew ka long la 11 bnai bad kane kala buh ia ki long iing long sem kiba trei hapoh jong katei ka District Council ha ka jingeh ban pyniaid ia ka iing ka sem.
U Bah Phazmon Iongloor u wei na ki EM hapoh jong ka JHADC bad ha ka juh ka por ba dei u nongai ktien ka party NPP kaba ialam ia ka EC, haba kren ha u SP News Agency la ong ba haduh mynta ka tulop kaba kim pat lah ban siew ka long 11 bnai haduh mynta.
Haba jubab ia ki jingkylli haba ia dei bad ka bhah kada JHADC ka dang dei ban ioh na ka sorkar, u bah Phazmon u la ong ba ha kine ki khyndiat bnai kila ioh ar sien ia ka bhah jong JHADC na ka sorkar jylla, kila ioh T. 14 klur bad T. 18 klur bad ia kane ka pisa la pynlut ha kaba siew ia ka tulop ki nongtrei.
Na ka liang jong ka EC ka dang ia kren bad ka sorkar ba kan dang pynlait shuh ia ka bhah ka jong ka JHADC kaba dang don kumba T. 100 klur ei ei bad ka sorkar lada khien ia ka tulop jong ki nongtrei ka dang sah mynta ka T.66 klur, na ka liang ka EC kala shim khia ban ia kren bad ka sorkar ba kan pynlait ia kane ka bhah ka jong ki ban ioh ban siew tulop ia ki nongtrei.
Kumba ka long mynta ka jingdon jong ki nongtrei hapoh jong ka JHADC ki don kumba 700 ngut ei ei bad ka jinglut ban siew ia ka tulop jong ki nongtrei baroh ha ka shi bnai ka long kumba T.6 klur ei ei kane la kheinlang ia ki nonghikai kiba don kumba 300 ngut ei ei.
