Shillong, Nailar 02: Ki nongtrei casual hapoh NEHU ki ba don hapoh ka lama jong ka All NEHU Workers’ Union(ANWU) ki dang pynjur iaki jing iakhih haduh mynta ka sngi , kane ka jing pynjur ia ka jing iakhih.
Kane ka long halor ka nongrim ba ki bor ba halor jong ka skul bah NEHU, Shillong kim pat lah ban pynurlong iaki jingdawa jong ki nongtrei iaka hok ban ai noh iaka regular status. Kumba bun ki nongtrei casual ki dei ki ba lah trei palat iaka shiphew bad ar phew snem ha NEHU.
Nalor ka regularization , ki nongtrei ki dawa iaka hok jong ka ‘equal work for equal pay’ , ka overtime, ka shuti pang , shuti kha khun jong ki longkmie bad kiwei kiwei ki hok jong ki nongtrei ki donhok ban ioh , ki ba lah bthah da ka sorkar pdeng jong ka Ri India.
Kum ban shu pyn kynmaw, ki nongtrei casual hapoh ka lama jong ka All NEHU Workers’ Union (ANWU) ki lah dep ban phah sha ka ophis u Vice Chancellor naduh ka 29.04.2022 hynrei ki bor bahalor jong ka NEHU ki leh kyllut iaki shithi jingdawa jong ki nongtrei casual .
Wat hadien shibun ki shithi pynkynmaw hynrei bor bahalor kim patiaw tad haduh ba ki nongtrei casual ki hap iakhih sangeh trei naduh ka 01.06.2022 haduh ka 15.06.2022 ; u Vice Chancellor jong ka NEHU u lah kular ban pynbeit bad pynbeit ia ka kam ban ai ia hok ban ai regular iaki nongtrei casual ha ka 15.06.2022.
Kumta naka liang jong ki nongtrei casual worker jong ka skulbah NEHU ha ka 16.05.2022 ki lah pynsangeh shipor katba dang iaid ki jingiakren hapdeng ki bor ba halor bad ki nongtrei casual ha nehu .
Hynrei ki nongtrei casual ki lah shem pynban ba u Vice Chancellor u lah shet kylla bad u khlem leh eiei ban pyndep iaki kular haduh kine ki sngi ba mynta. Ka ba lah pynkhluit shuh shuh ka long ba ki bor ba halor ki lah byrngem ban weng bad ki la ot tulop ruh iaki nongiakhih ban dawa iaka hok.
Na ka liang ka Union , ki pynpaw iaka jingsngew mong namar ba u Vice Chancellor ka NEHU u khlem pat treh ban kren ne ban sngap iaki jingeh jong ki nongtrei casual NEHU. Kane ka dei naka daw ba ki nongtrei casual ki dei ki riewlum bad kim dei na ka jaid bakhraw kum ma u.
Kane ka paw shai , namar ba u Vice Chancellor ka NEHU , u kloi ban kynduh iaki para bakhraw bad ki ba don kyrdan hynrei ym pat iaki nongtrei casual. Ka Union ka pynpaw iaka jingpyrshah ba u Vice Chancellor u phah iakren bad pynbeit man ia u nonghikai u ban sa shongthait noh mynta u bnai Nailar jong u snem 2022.
Ki nongtrei casual hapoh ka Lama jong ka All NEHU Workers Union ka phah khubor ba kan dang pynkhlain bad bteng iaki jing iakhih shah thngan wat haduh ban daiap ruh ban ioh iaki jingdawa jong ki nongtrei casual.
Ka All NEHU Workers Union (ANWU) k aba dei ruh ka Trade Union kaba lah ioh jingithuh katkum ki lynti ka ain hapoh ka Trade Union Act 1926 ; ka dawa tyngeh ba iaki post ba lait dei ban ithuh shwa bad thep iaki casual workers shwa ban pyndap ne ban thep da ki briew ba thymmai.
Ka Union ka dawa iaki bor ba halor ba kim dei ban weng ne beh kam iaki nongtrei casual ki ba lah thung da ki bor bahalor ka NEHU hashwa ka snem 2016. Iakane ka khubor la pynlait u President jong ka All NEHU Workers Union (ANWU) hadien ka jingiabeit lang jong ki dkhot jong ka Union.
