Shillong, Jylliew 13: U Myntri ka tnad rep u Bah Banteidor Lyngdoh u la iathuh ba tnad rep mynta ka dang pynkhreh ia ka polisi ha kaba ia dei bad ka rep ka riang ha ka jylla Meghalaya, ia ka por lano ban pyndep yn nym lah ban ong tangba ka tnad rep kala iaid sha khmat ha kaba ia dei bad kane ka kam.
Haba kren ha ki lad pathai khubor mynta ka sngi ha dien ba la wai ka jingiakren bad ki ophisar jong ka tnad rep ha ophis jong ka Directorate, la iathuh ba ha kane ka sngi la ioh ban ia kren bad u myntri ka tnad rep ka sorkar pdeng lyngba ka “Video Conferencing” bad ka jingiakren ka long ha kaba ia dei bad ki nongrep.
Ha kane ka jingiakren ka long halor ka skhim kaba u myntri rangbah duh jong ka Ri India u la pynbna ba iarap T.6000 tyngka man u snem, haba ia dei bad kane ka sorkar mynta ka dang ialeh ban lum kyrteng ia ki bad la antad ba ki nongrep ha ka jylla ki don haduh hynriew lak ngut.
La iathuh ba na ka liang jong ka tnad rep kan dang don shibun ki jingeh kiba ki dang hap ban iaid na ka bynta ban iarap ia ki nongrep ha ka jylla ha kaba ka sorkar kala shim khia ban kyntiew ia ka rep ka riang ha ka jylla.
Haba jubab ia ki jingkylli ha kaba ia dei bad ki marrep kiba lah ban shallan sha bar jong ka Ri India la ong ba haduh mynta dei tang u slasha bala lah ban die sha bar jong ka Ri India, hynrei ia kiwei dang ia dei hi sha bar jong ka jylla.
