Shillong, Nohprah 08: Wat la ki seng sain pyrthei baroh kila pynkhreh iala ki jong ki jong ki kyrtong ban pynieng ha ka Ilekshon MDC sha ki ar tylli ki iing dorbar jong ka KHADC bad JHADC kaba dei ban long ha u Rymphang lane Lber jong u snem 2019 ka dang don hapdeng ka jingartaitien.
Wat la ka sorkar Meghalaya kala dep ban bethah ia ki Deputy Commissioner jong ki District bapher bapher kiba hap hapoh jong kitei ki ar tylli ki iing dorbar jong ki District Council ba kin sdang noh ia ka jingpynkhreh, hynrei ka jingartatien ka long ba lada ka iing dorbar thawain jong ka Ri India ka wan rah ia ka jingpynkylla ia ka Sixth Schedule hapoh Parliament ha kane ka dorbar tlang ban sa wan, ia ka tarik ym pat buh.
Ki thymmei khubor kiba la ioh na ka District Council affair jong ka sorkar jylla, la ong ba lada ka sorkar pdeng ka leit ban rah sha poh Parilament ba wanrah ia ka jingpynkylla ia ka Sixth Schedule, la hap ban pynjlan ia ka por trei ka kam jong ka iing dorbar jong ka KHADC bad JHADC namar hap ban thaw konstitwrnsi thymmai.
Lada ka parliament ka mynjur ia ka jingdawa na ki lai tylli ki District Council kiba don hapoh ka jylla Meghalaya, ka GHADC bad ka KHADC kin ioh mar 40 ngut ki MDC bad na kine 35 ngut hap ban jied da ka ilekshon bad 5 ngut un shut hung, ka JHADC kan ioh 35 ngut ki MDC ha kaba 30 ngut hap ban jied da ka ilekshon bad 5 ngut yns hut hung.
Kumba ka long mynta bun na ki kyrtong kiba kwah ban ia khun ia ka MDC ilekshon ha u snem 2019 sha ka iing dorbar jong ka KHADC bad JHADC ki dang klumar jingmut namar kim pat shai la ka ilekshon kan long ne em ha u bnai Rymphang ne Lber, namar haduh mynta ym pat shai la ka sorkar pdeng kan wan rah ne em ia ka jingpynkylla ia ka Sixth Schedule ha kane ka dorbar tlang jong ka parliament.
