Dawa ka AJYWO, ka GR Infra kan pynbeit mardor ba spel dak kulmar ia ki shnong ha Jaintia Hills

Jowai, Lber, 22: Ka AJYWO Central Body lyngba u kyrwoh ba la pyllait da u Bah M.H Dkhar, President jong ka seng, ka dawa na ka GR Infra Project Ltd ban pynbeit noh lane pynhap noh mardor ia baroh ki signboard jong ka kiba ka lah pynieng ha shilynter jong u NH-44 ia kiba la shuh spel dak kulmar laki-laka ia ki jaka, ki shnong bad ki dong ha Jaintia Hills khnang ba kane kan ym ialam bakla ia u paidbah bad ruh khamtam eh ktah ia ka jingkynnoh tynrai jong ki trai ri trai muluk ia ki kyrteng jong ki shnong, ki  dong bad ki jaka kat kum ba la jer la suid ia ki  da ki longshuwa manshuwa bad ruh ki dorbar shnong bad ki dong ba pher ba pher hapoh Ri Jaiñtia.

“Ka  long kaba lyngngoh ba kumno ka GR Infra, ka company ka ba dang pyntrei mynta shait shait ia u NH-44 ka nud ban shuh sieh signboard kulmar bad kdew ia ki kyrteng jong ki shnong, ki dong bad ki jaka ba pher ba pher ha Jaintia Hills ha baroh shilynter jong u NH-44, khlem da ia kynjoh ktien bad ki nongialam shnong ban ioh ia ka kyrteng bad rukom spel dak ba thikna jong kitei ki jaka baroh, khnang ba kan ym don kano kano ka jingialam bakla ia u paidbah ne pynmong bad ktah ia ki dorbar shnong, ki dorbar dong bad ia ki trai ri trai muluk jong ka Ri Jaiñtia da kaba leh kulmar kumtei”, ong u Bah M H Dkhar, President jong ka AJYWO Central Body.

U tei u nongialam jong ka AJYWO u la ong shuh shuh “Kum ban shuh kdew, ia ka shnong  Khliehriat kaba dei ka Nongbah jong ka East Jaintia Hills District la thoh ha ki signboard “Khaleriat”; Ia ka Lad-Rymbai la thoh “Ladrymbia”; iaka Dong Snahleiñ ha Wapungskur la thoh “Snahlien”; Bad ia ka ka lad ban leit sha Pamrapaithlu/Pamrakmai la shu thoh “Pambra”  bad kiwei kiwei de ki signboard  ha kiwei pat ki jaka, ki dong bad shnong kiba bkla, lehse kiba ka seng kam pat ioh  leit  peit haduh mynta”.

“Ngi don la ka jong ka kyntien bad ia ki kyrteng jong ki shnong, ki dong bad ki jaka puta hapoh Ri Jaiñtia la jer kyrteng bad sin da ki longshuwa man shuwa bad ruh ruh kiba la jer bad dang shu sin ha ha ki pateng ba dang shu leit ha ka Ktien Tynrai jong ngi hi bad ia kane ngi kum ka Jaidbynriew, ngi donkam ban pynneh pynsah bad ngin ym ailad da lei lei ruh em ba yn pynkylla khongpong pat ia ka ktien jong ngi lane ia ki kyrteng jong ki jaka, ki shnong bad ki dong jong ngi  ha ka rukom kren jong kiwei pat ki kynhun jaidbriew ki bym nang ba kynnoh bha ia ka ktien jong ngi”. Bynrap biang u Bah Dkhar.

Ka AJYWO ka la ong shuh shuh lyngba u kyrwoh, “Kiwei pat ki kynhun jaibynriew, Ki lah ban kynnoh ktien ia ka ktien jong ngi bad ki kyrteng jong ki jaka, ki dong bad ki shnong jong ngi katba u thylleij jong ki u shah, hynrei ngim dei pat de ban ailad ia ki ba kin spel dak kulmar bad buh ha ki jingthoh da dei ha kano kano ka rukom ruh khnang ba kane kan ym ktah iaka Jaidbynriew bad ka pateng ban dang wanjong ngi hadien ha bud”, ong u Bah M H Dkhar.

Ha ka jingiadei bad katei ka jingspel dak kulmar  ia ki jaka, ki shnong bad ki dong jong ka Ri Jaiñtia ba ha ki signboard ba la pynieng da ka GR Infra, ka company ba pyntrei mynta ia utei u surok, ka seng ka dawa mardor na katei ka company ban pynbeit noh ia kitei ki jingspel dak kulmar lane weng noh  mardor ia ki bad sieh da kiwei pat kiba thymmai kiba dei khnang ba kane kan ym ialam bakla ia u paidbah bad ruh ktah ia ka Ri bad ka Jaidbynriew.

U Bah M H Dkhar u la pynkut da kaba ong ba ha ka jingiadei bad kane ka jingdawa jong ka seng na katei ka company halor kiteiki signboard, shen ka seng kan sa leit ia kynduh ia u Deputy Commissioner jong ka East Jaintia Hills ban dawa na u ban tulkla lem halor kane.

What Next?

Recent Articles

Leave a Reply

Submit Comment

*