Jowai, Jymmang, 29: Ka All Jaintia Youth Welfare (AJYWO), Central Body, ka dawa na ka GR Infra Ltd ka company kaba dang pyntrei shait shait ia u surok NH-6 naduh Sumer West Jaintia Hills District haduh Malidor East Jaintia Hills District ban thoh pynbeit noh mardor ia ki jingspel-dak ba bakla jong ka ha kiba bun ki signboard kiba ka la pynieng ha shilynter ka surok bah NH-6 ba iaid lyngba ka NH-6.
U Bah M H Dkhar President jong ka AJYWO Central Body, u la ong, “Ka jingbakla spel dak jong ka GRIL ia ki shnong ki thaw bad ki jaka puta jong ngi, kane, ka la ktah ym tang ia ka jingsngew jong ngi kum ki trai ri trai muluk, hynrei kane kan sa ktah ruh ia ka pateng ka ban dang wan bad ruh ialam bakla ia ki paidbah nongleit nongwan lyngba jong ka NH-6.
“Haba ka don ka jingbakla, ka jingpynbeit ka dei ban don. Haba ka ka GR Infra Ltd. Ka bakla ha ka jingspel-dak ia ki shnong ki thaw bad ki jaka puta jong ngi ha kiba bun ki signboard ba la pynieng ha shilynter jong u NH-6, ka dei ban pynbeit noh ia ki mardor bad lada kam pynbeit, ka mut ba ka leh khnang, ia kaba ka AJYWO bad ka Jaidbynriew jong ngi, kam lah ban pdiang da lei lei ruh em,”, ong shuh shuh, u Bah M.H Dkhar
Kum ban shu pynkynmaw, halor ka jingspel dak kulmar jong ka GRIL ia ki shnong, bad ki jaka puta ha ki signboard ha ki ba bun ki bynta jong u NH-6, ka AJYWO ka la ujor sha u Deputy Commissioner jong ka East Jaintia Hills District, ha ka 23 tarik u Lber, mynta u snem, u tei u khliehduh jong ka district ruh mar ia ioh ia ki jingujor jong ka AJYWO, u la thoh wut wut sha katei ka company ban pynbeit noh ia ki jingbakla, hynrei haduh mynta katei ka company kam shym la pynbeit ia la ki jingbakla.
U Bah MH Dkhar, u la ong biang, “Lada ia ka jingbakla thoh ia ka kyrteng u surok, kum ka NH-44 ha ka jaka ban thoh NH-6 lah ban pynbeit tang hapoh khyndiat taiew, kan eh aiu ia ka GRIL ban pynbeit ia ki jingbakla ha ka jingspel dak kulmar ia ki shnong ki thaw bad ki jaka puta jong ngi ha ki signboard lyngba ka NH-6, na ka bynta ka jingmyntoi lang jong baroh khamtam jong ngi ki trai ri trai muluk.”
“Mynta, lei da ki bnai, ha ki signboard ba ka GRIL, ka la bakla thoh kyrteng ia ki jaka puta bad ki shnong, ki thaw, la paw man da ki rong iong, ha ka jaka ban pynbeit ia ki mardor, na ka bynta ka jingmyntoi jong u paidbah nongleit nongwan lyngba u NH-6, nalor ba ka long kum kawei na ka jingpynitynnad ia utei u surok bah hynrei ka ka jingkylli mynta ka long, shaei jah ki shnong ki thaw, ki jaka puta, ki skul, ki trai ri trai muluk na kitei ki signboard jong ka NH-6.
Hato ka NH-6 ka iaid lyngba ki lum ki wah, ne ki khlaw ki btap ki ba ym donkam kdew kyrteng ha ki signboard jong u. Nga tharai wat lada u iaid lyngba ki lum ki wah, ne ki khlaw ki btap, kine ruh kin don beit hi ia ki kyrteng ba la buh da ki trai ri trai muluk bad ka long kaba donkam ban kdew ia ki kyrteng jong ki na ka bynta ka jingmyntoi jong u paidbah. Katno tam ia ki kyrteng ki shnong ki thaw, ki jaka puta, ki skul bad kiwei kiwei kiba kiba don ha shilynter jong ka NH-6, kiba donkam bha ban kdew kyrteng khnang ba u paidbah un myntoi bad ruh pynitynnad ia u surok?” la buh jingkylli Bah MH Dkhar.
“Ka AJYWO ka dawa jur na ka GRIL ka company kaba pyntrei ia ka NH-6 ba ka dei ban burom ia ka jingbthah jong u DC jong ka EJH bad ruh ia ka jingsngew jong ki trai ri trai muluk da kaba thoh pynbeit noh mardor ia kitei ki jingbakla spel dak ia ki kyrteng jong ki shnong ki thaw, ki jaka ki puta bad kiwei kiwei. Ka seng ka kwah ban iohi ba ki jong ngi ruh kin paw lang ha kitei ki signboard jong ka NH-6, hynrei ym tang ia ka ka kyrteng bad jingjngai jong kiwei ki jaka puta, ki shnong ki thaw kiba don shabar jong ka jylla”, la pynkut u Bah M H Dkhar.
