Shillong, Iaiong 05: Ka seng Hynniewtrep People Front (HPF) jong ka Ri Bhoi District kala dawa na ka PWD ka tnad shna surok jong ka sorkar Meghalaya ba kan siangrong noh ia ka surok na Marngar sha duh shnong Umden jong ka Ri Bhoi District kaba la sniew palat.
U President ka seng u bah Apbor Nongrum President ka Ri Bhoi ryngkat ki nongkit kam ka seng u bah J F Tmung bad u bah Phrikson Trang kila ong ba ka surok naduh marngar shaduh ka shnong Umden kala sniew bha bad kane kala pyndik ia ka leit ka wan jong ki paidbah.
Na ka liang jong ka seng ka Kyntu ia u MLA jong kane ka jaka u bah Mayralborn Syiem bad ia u MDC u bah Balajied Ranee ba kin shim khia lem ban ia kren bad ka PWD ban siang rong noh ia kane ka surok khnang ba ka leit ka wan ki paidbah kiba don bun phew tylli ki shnong ha katei ka thain.
Ki shnong kiba dei iaid lyngba kane ka surok kaba poi sha duh Assam ki don da ki phew tylli ki shnong, la ong ba ka jingsniew kane ka surok kala bun snem mynta hynrei na ka liang jong ka PWD kam shym la maramot ia kane ka surok kaba la dap sa tang da ki thliew ki syar.
U bah Apbor Nongrum President ka HPF la ong ba da poi ki por tlang ia kane ka surok la juh maramot da ki seng nongniah kali na katei ka thain, na ka liang jong ka HPF ka dawa na ka PWD ba kan siang rong noh ha kane ka snem mang tyngka 2022-2023.
