Shillong, Nohprah 01: Mynta ka sngi ka seng Hynniewtrep People Federation (HPF) kala leit ban ia kynduh ia u bah Titosstarwell Chyne Chief executive Member (CEM jong ka KHADC ha kaba kila dawa ba ka ophis ka dei ban bthah ia ki bor shnong ban nym ai NOC pathar.
Ha kane ka jingiakynduh hapoh ka jingialam jong u president u bah Gardon Khongsit, kila pynsngew ha u CEM ka KHADC ba kane ka jingbthah kam dei ban long tang ia ki bor shnong hynrei ka dei ban long ruh ia ki Syiem, Sirdar ban nym ai NOC pathar sha ki briew kiba na bar.
Ka HPF ka dawa ba ka KHADC ka dei ban shim khia ia kane ban ia kren bad ki khlieh nongsynshar ba kim dei ban ai NOC pathar katba ym pat pyntrei kam ia ka Inner Line Permit ha kane ka jylla Meghalaya.
Kumba ka long mynta ka seng HPF ka iohi ba ki briew kiba na bar kila jyllei sha kane ka jylla bad ban teh lakam ia kane dei tang ki District kiba lah ban bthah ia ki bor shnong ban nym ai NOC pathar ha kaba pan ia ka Laisen khaii, na ban wan bylla.
Ha kane ka jingiakren na ka liang jong u CEM jong ka KHADC kren shai ha ki nongialam jong ka HPF ba ka ophis kan but ryntih ia ki kyndon jong ka ain kiba la don ha kaba ia dei bad kane ka bynta.
