Shillong, Jymmang 10: Ka HYC mynta ka sngi hapoh ka jingialam jong u President ka seng u Bah Robertjune Kharjahrin kila ia kynduh ia u myntri kam poh iing ka jylla u James K Sangma ban ai ia ka dorkhas, ha kane ka jingiakren kila dawa na ka sorkar ba ka dei ban wan rah noh ia u Bah Michael Warjri na Assam sha Meghalaya.
Haba kren ha ki lad pathai khubor ha dien ka jingiakynduh bad u myntri kam poh iing u Bah Robert u la ong ba ka long ka jinglehraiñ kaba khraw ia ka jylla Meghalaya ba ki pulit na Assam kin wan ban tuklar ia ka jingjia hapoh Meghalaya, kane ka jingleh ka dei ka jingñiew bein ia kane ka jylla.
Na ka liang jong ka seng ka iohi ba kum kine ki jingjia ki jia tang lada don ki kam pynroi, lada leh da ka jylla Meghalya pyn jop na Assam bad lada leh na Assam khang na Meghalaya bad kum kine ki jingjia ki juh mih na ka por sha ka por.
La ong ba kala don ka jingiasoi ia sngewthuh ha pdeng ka jylla Meghalaya bad Assam ba shuwa ba leh ia kino kino ki kam pynroi dei ban da ioh ia ka jingiamynjur lang na baroh ar liang khnang ba ki paidbah kim dei ban long ki langknia.
La iathuh ba ha kane ka jingiakynduh mynta ka sngi, na ka liang jong u James K Sangma myntri kam poh iing ka jylla u la kular ia ki nongialam ka HYC ba ka sorkar kan shim khia ia kane ka kam, bad u la iathuh ha ki dkhot jong ka seng ba ka tnad pulit na ka jylla Meghalaya kala dep ban ia kren bad ka tnad pulit jong ka jylla Assam halor kane ka jingjia ha New Balakhawa.
