Jowai, Rymphang 28: Ka Jaintia Students’ Uniuon (JSU) mynta ka sngi hapoh ka jingialam jong u President u Rikut N Parien bad u General secretary u Emperor Bareh kala leit ia kynduh ia u CEM jongka JHADC u Ma Thom Shiwat hapoh ka karma treikam jongu, ha kaba la aiti iaka jingthoh ban dawa naka u bad naka EC kaba mynta ban pyntreikam iaki lai tylli ki mat jingdawa kiba donkam kyrkieh naka bynta ka bha ka miat bad ka roi ka paor jongka ri bad ka Jaitbynriew baroh kawei.
Ka mat kaba nyngkong kaba la buh hakhmat u CEM bad ka EC jongu ka long “ ban Pynkha noh sa kawei ka Tnad treikam (Department) hapoh ka JHADC kata ka dei ka Arts & Culture Department”. Ka nongrim ba ka JSU ka wanrah ia kane ka mat ka long namar ba ka Council hi kum ka nongpeit bad ka nongri nongda iaka Riti ka Dustur kam don satia ia kane ka Department baroh shi katta. ‘Ha ka jingshisha hapoh ka Council kane ka Department ka dei ban khlain bhah, hynrei kaba phyla ka long ba kam don satia hapoh ka Council bad dei halor kane ka nongrim ba ka Union kala dawa naka Council ba ka dei ban pynkha noh shi syndon ia kane ka Department ong u President aka JSU.
Ka mat kaba ar kaba ar bala dawa na u CEM bad ka EC jongu ka long “ ban thaw iaki kyndon ain kiba khlain ba iada iaki Um ki Wah”. Ki nongialam jongka JSU haba iakren bad u CEM kila pynpaw iaka jingsngewkhia kaba khraw halor ka jingtlot ki kyndon ain jongka JHADC halor ka jingpynneh pynsah bad ban iada ia ki Um ki wah. Kum ka nuksa ka Wah Myntdu, ka wah Lukha, ka wah Mynkjai kila don mynta haka jingma kaba khraw namar ka jingjakhlia kaba mih naki ba bun ki jaka. Kumta ngim kwah ban ka NGT kan hap ban tuklar halor kane hynrei ngi buh iaka jingdawa naka JHADC ba ka dei ban thaw da ki ain kiba rkhin bha bad dup lah ban iada iaki, ong u samla emperor Bareh General Secretary ka JSU.
Ka mat kaba lai ba ka JSU kala wanrah ha khmat u CEM kaq long “ ban pynbeit ia u Pud u Sam jongki Elaka baroh hapoh ka Ri lum Jaintiaq”. Halor kanje ka JSU ka pynpaw ba ka jingbym don ki Elaka bapher bap her iala u pud u sam ba biang bunsien kala wanrah iaka jingia khajia bad ka jingbym iasngewthuh jingmut ha pdeng ki para doh para snam ha pdeng kawei ka Elaka bad kawei pat. Teng teng ka juh wanrah ruh wat shaka jingsngewsih kaba khraw tang namar u pud u sam. Kumta kane ruh ka dei kawei naki mat kaba donkam kyrkieh iaka jhadc ban shimkhia bad pynbeit noh kloi.
Halor kine ki lai tylli ki mat, na ka liang u CEM, u la kubur ba kine ki dei shisha ki mat kiba doinkam eh iaka Council ban leh bad u la kular iaki nongialam jongka JSU ban shimkhia bad ban iakren hapoh ka EC. Ha kajuh ka por u la ong ruh ba lah ban wan rah iaki hapoh ka Ing dorbar ruh khnang bay n dup lah ban pyntreikam pura iaki. Bad na ka liang ka JSU kala ban jur ban pyntreikam beit ia kine ki mat naka bynta ka bha ka kiat bad ka jingmyntoi jongka ri bad ka Jaitbynriew hi baroh kawei. Kane ka long katkum ka jingpyllait khubor u General Secretary ka JSU u Samla Emperor Bareh.
