Shillong,Nailar 10: Ka Khun Hynniewtrep National Awakening Movement (KHNAM) State Youth Wing ka la dawa na u Chief Secretary Y Tsering ka Jylla ban kyntiew ia ka karta sha ka 40 snem khnang ba kan long ka jingiarap ia ki samla wad kam kumba leh ha kiwei ki jylla.
U Bah Thomas Passah u president ka KHNAM SYW haba kren ha ki nongthoh khubor ula ong, ka seng ka don ia ka jingsngewkhia kaba khraw halor ka jingbun ki samla ba la nang la stad hynrei ki bym ioh kam ioh jam na ka daw ka jingbym lah ka sorkar ban pynrung kam ia kiba bun ki samla ba don sap ha ki ophis sorkar.
U Bah Thomas ula ong,“Ngi buh ia ka jingdawa na ka sorkar ba ka dei ban kyntiew noh ia ka karta jong ki samla na ka 32 snem sha ka 40 snem kumba la leh ha kiwei pat ki jylla jong ka thain shatei lam mihngi khnang ba kan plie lad ia ki samla kiba lah ban trei ia ka kam.
Ula ong,ha ki kyndon ain kat kum ka Meghalaya Service Rules 1975 hapoh ka section 9 Para (ii) ka la batai shai “ia ka karta ban thep kam jong ki kyrtong lah ban kyntiew lada ki dei na ka jaitbynriew ba kyrpang kat kum ki kyndon ha kaba ia dei kyllum lang ne dei kyrpang bad ka sorkar ka dei ban khmih na ka por sha ka por.
Ha kajuh ka por ka KHNAM SYW ka la iai ban ktien ia ka jingdonkam ban pyntrei kam ia ka Meghalaya Civil Service Rules khnang ba pyntikna ba ka jingioh kam ki khynnah samla ka jylla kaba la kdew shai ha ka Meghalaya Civil Service Rule 1975 ba ki samla wad kam ki dei ban nang ia ka ktien khasi.
