Shillong, Iaiong 28: Ka KSU Shillong Mihngi Circle ka pynpaw ia ka jingsngewsih halor ka jingjia ba la jia ha ka 26 tarik u Ïaiong 2020 hapoh ka shnong Umkdait, Nongmensong ha kaba ki paid nongshong shnong kane ka dong ki la mih sha khmat ban dawa jingiarap lyngba ki placards bad ki jingud jingnam.
Ka seng ka sngew ba namar une u coronavirus uba shyrkhei bad u ba saphriang sted, la pyntrei kam ia ka ‘lockdown’ lyngba ka sorkar bad ka jingmynjur salonsar da u paid nongshong shnong ka Bri u Hynniewtrep.
Hynrei hapdeng kane ka jingiakhun lyngba ka lockdown ka don ruh ka ‘side effect’ kaba ktah pat khamtam ia ki briew ba jynjar ba shitom ha ka ioh ka kot, ki briew kiba duk ba raitong.
Ka daw ka long ba kum kine ki briew ki duh ia la ki kamai jakpoh bad ban pyndap ia la ki longiing kaba buh ia ki ha ka khim ka khait. Dei halor kane ka mat ba ki sengbhalang, ki nongmihkhmat bad ki riewshimet ki kner ia la ki kti ban noh jingiarap ha kum kine ki por.
Ka KSU kan yn pyndonkam ia kane ka kyrwoh ban pynrem iano iano ruh halor katei ka jingjia, namar ka sngewthuh ba ha kum kane ka por ka don kam ka jingia sngewthuh jingmut bad jingiatreilang lang jong baroh ki paid, ki kynhun bad kumta ter ter bad lada ka don ka jingbakla lane kano kano ka jingleh shiliang lane jingbym ia sngewthuh jingmut donkam ka jingiapynbeit khnang ba yn lah ban pynurlong ia ki jingangnud.
Ka sorkar ruh katkum ka jingioh jingtip ka la pynshitom ia kito ki paid nongshong shnong ka Umkdait kiba mih sha khmat da kaba kem bad thep case ia ki kaba long kaei kaei ka sngewsih shikatdei.
Sa shisien biang ka seng ka sngewdei ba ha kum kane ka por kan ym bha iano iano ruh ban pyni bor lada dei ki paidbah, lane ki nongmih khmat lane ka sorkar, hynrei dei ban wad ki lad ki lynti ki ban wanrah ia ka shongsuk shnong shngain bad ki jingiasngewthuh jingmut jong baroh ki kynhun.
Halor kitei ki jingjia baroh, ka KSU Shillong Mihngi Circle ka kyntu ia ka sorkar ba kan kiar ban kem ia kitei ki samla bad ki longkmie bad ia kiba la kem dei ban pynlait noh. Pynban ka KSU ka ai jingmut ba ka sorkar ka dei ban long ksiang ban pyniasuk ia baroh ki kynhun ban lait na ka huri hura.
Shuh shuh ka seng ka sngewdei ruh ban ai jingmut ia ka sorkar ba ka dei ban pynbiang ki jingdonkam kito ki paidbah ka Umkdait kumba la leh ha kiwei ki jaka. Kyntang ia wai ka KSU ka long kaba kloi ban iarap ia ka sorkar, ki shnong bad ki paidbah ha kano kano ka liang ha kum kane por
Na ka liang jong ka KSU kila iathuh ba baroh kiba la shah kem ki long 10 ngut na kine 7 ngut dei ki shynrang bad lai ngut ki dei ki kynthei la ong u samla Sonstar Nongkhlaw President KSU Mih ngi Circle.
