Dawa ka KSU na u MLA ka thain u bah Pius ban pynioh ia ka ophis ka tnad rep ha Umdohlun

Shillong, Risaw 26: Ka KSU South West Khasi Hills District bad ka KSU Umdohlun Circle hapoh ka jingialam jong u Samla Dusterwell K. Lyngdoh, Organising Secretary KSU South West Khasi Hills hynne ka sngi ki la leit ban iakynduh ia u Bah Pius Marwein,  MLA jongka Ranikor Constituency ban pynpaw ia ka jingsngewkhia halor ki jingeh jongki nongrep hapoh jongka thain Wahkaji, Phlangdiloin,  Umdohlun bad Warsan Lyngdoh area.

Ka seng ka la pynpaw ba kiba bun ki paitbah kane ka thain kim lah ban ioh iaki lad jingiarap naka sorkar namar ka jingbym don ki bhah ba kyrpang iaka thain Umdohlun,  Wahkaji,  Phlangdiloin bad Warsan Lyngdoh naba ki hap hapoh ka jingpeit lang jong ka Agriculture Development  Officer (ADO) na Mawkyrwat bad kumba long mynta kumba kane ka Headquarter Office la iar palat ka jylli treikam kumta ka dong ka thain naka por sha ka por ka la shu shah ieh khunswet noh ha ka kam rep kam riang haki bor sorkar.

Haba iadei bad kane, ka seng ka pynsngew ha khmat jong u MLA ka thain ba kumba ha District jong ki ka dang don tang kawei ka ophis jong u Agriculture Development Officer ha Maheshkhola la sngewdei ba phin thaw ki lad ki lynti ban wanrah ia kaba kum kane ka ophis haka thain jongngi khnang ba ki paitbah ka thain kin ioh iaki jingmyntoi.

Ka jingdon jong kaba kum kane ka ophis kan iarap shibun iaki nongrep kane ka thain namar ba nalor ka jingdon jong u Agriculture Development Officer yn don ruh ki nongtrei kum u Demonstrator bad kiwei kiwei ki ban peit iaki jingdonkam halor ka kam rep kam riang hapoh ka thain.

Ym tang katta, ka jingdon jongka Ophis ADO (Circle)  haka thain Wahkaji ne Umdohlun kan pynlong iaki bor sorkar ban ai ki bhah jingiarap kyrpang (Schemes) ia ki nongrep kane ka thain kiba la shah ieh khunswet baroh shikatta haka sorkar.
Ka seng namar kata ka ngeit Skhem ba u MLA un shimkhia ia kane ka mat ba ngi la pynsngew bad ngi kyrpad ruh ia u Bah Banteidor Lyngdoh,  Minister jong ka Tnad Agriculture jongka Jylla ba un shimkhia lem ia kane ka jingeh ba ki paitbah ki la iakynduh baroh shikatta. Ka kyrwoh na u Samla Dusterwell K. Lyngdoh,  Organising Secretary KSU South West Khasi Hills District

 

What Next?

Recent Articles

Leave a Reply

Submit Comment

*