Shillong, Risaw 01: Ki nongialam jong ki nonghikai kolej ha ka jylla Meghalaya ha ka kyrteng jongt ka ‘Meghalaya College Teachers Association’ (MCTA) kila leit ban ia kynduh ia u myntri rangbah ka jylla u Conrad K Sangma ha kaba kila ai da ka jingthoh sha u myntri rangbah ha kaba ia dei bad ki kam hikai hapoh ki kolej.
Ha kane ka jingiakynduh bad u myntri rangbah kajylla na ka liang jong ka MCTA kala long ba ka sorkar Meghalaya haduh mynta ka dang but ia ka rule jong ka jylla Assam ia kaba la tip kum ka Assam Aided College Employees Rules jong u snem 1960 ka bymia hap shuh ha kane ka pormynta.
Ki nongialam jong ka MCTA kila kyntu ia u myntri rangbah ban pyntrei kam noh iaki kyndon jong ka University Grants Commission (UGC) kumba ka long. Ha kane ka jingiakynduh la ong ba ha u snem 2015 Nailur ka UGC kala kren shai ba ki sorkar jylla ki dei ban pyntrei kam khlem da pynkylla iaki kyndon ka UGC.
Ha kane ka jingiakynduh ka MCTA kala ong ruh ia u myntri rangbah ka jylla ba ka sorkar ka dei ban buh noh ia ka ‘State Univeristy’ na ka bynta ka jingdon kam jong ki khynnah ba kin ioh ka lad ban pule sha ki kyrdan kiba kham sha jrong. Ha kane ka jingiakren u myntri rangbah u la ong kaba kongsan eh dei ban don ia ki jaka pule kiba la tip kum ki technical institutions.
Haba ia dei bad ki kam hikai la iakren ba ia ki kolej Adhok dei ban kyntiew kyrdan noh sha ka Deficit bad ban thaw shuh shuh ia ki kam hikai bad ban pynbeit ia ka jingtrei kam jong ki nonghikai kiba hikai ha ki kolej jong ki riew shimet bad ladon kam ban dang don shuh shuh ia ki kolej ia kiba la tip kum ka “Colleges of Teacher Education” ha ka jylla. Kane ka jingiakren baroh ka long ban pynbha ia ka pule ha ka jylla.
U myntri rangbah ka jylla u la ong ha ki dkhot jong ka MCTA ba ka sorkar ka dang peit na ka bynta ban pyntrei kam noh ia ka “7th Central Pay Revision” na ka bynta kito ki nonghikai kiba ioh ia ka tulop katkum ki kyndon ka UGC bad ia ka “ 5th Pay Commission” na ka bynta ki nonghikai kiba ioh ia ka tulop na ka sorkar jylla.
