Shillong, Nailur 21: Ki nongtrei jong ka Garo Hills Autonomous District Council (GHADC) hapoh kalam jong ka Non Gazette Employees Association (NGEA) hapoh ka tei ka District Council kala pylong ia ka jingtah poster ha phyllaw jong katei ka ophis ban dawa ba dei ban thungkam biang ia kito ki nongialam kiba la shah weng kam.
Ha dien ba ki dkhot jong ka NGEA kila dep ban tah ia ki poster ki pulit kiba don hapoh GHADC kila tar noh ia ki poster ha dien shiphang ba ki nongtrei ka GHADC hapoh ka kynhun NGEA kila tah ia ki poster ha phyllaw ka ophis.
Ha ki poster ka NGEA kala thoh shai kdar ba kum ka seng ka dawa na ka Executive Committee jong ka GHADC kaba la ialam da ka party NPP ba ka dei ban thungkam biang ia ki nongialam jogn ka NGEA kiba la shah weng kam ha kane ka EC kaba thymmai hapoh ka jingialam ka NPP.
Ha ka juh ka por na ka liang jong ka Executive Committee mynta ka sngi kala pynmih ia ka hukum ba baroh ki nongtrei ka GHADC ba dei ki ban poi sha jingtrei ha ka por 10.30 baje mynstep bad kin mih na jingtrei ha ka por 5.00 baje jan miet bad kiba wan trei ki dei ban da soi ha ka register.
Ka hukum kaba la pynmih mynta ka sngi kala kren shai kdar ba lada don kiba pep trei khamtam la shai ka sngi na ka liang jong ka ophis kan khate ia ka bai trei jong ki , kane ka dei ka hukum kaba la bthah ia baroh ki nongtrei ka ophis naduh kito kiba trei sngi bad ki nongtrei muster roll ruh kum juh.
