Shillong, Iaiong 03: Ban wanrah ia ka jinghiar ia ka dor doh masi na ka liang jong ka seng ki nongot doh masi ia kaba la tip kum ka Khasi Jaintia Butcher Association (KJBA) kala buh ha khmat jong ka sorkar ia ki ar tylli ki mat trei kam kumno ban ialeh ban pynhiar ia ka dor jong ka doh masi ha ki iew ki hat.
U Generous Warlarpih president ka seng KJBA u la ong ba kum ka seng kala buh ha khmat jong ka sorkar ia ki ar tylli ki mat ia kren ban ialeh ban tehlakam ia kane ka jingkiew dor ka doh masi bad ban pynhiar ia ka dor, kawei ka long ba ka sorkar kala dei ban pyniaid ia ka jingiadie ia thied masi ha ka dor kila ym shuh kumba ia thied tylli shijur shijur kumba ka long mynta.
Ban iada na ka jingwan ki nongthied khasi masi beain sha Bangladesh ka sorkar kala dei ban register ia ki nongotdoh masi bad kane kan iada na ka jingshallan tuh ia ki masi sha Bangladesh namar kumba ka long mynta ki nongkhaii masi kim lah shuh ban thied masi namar ka dor kala kiew palat.
Na ka liang jong ka KJBA kam sngewthuh shuh ha kaba ia dei bad ka iew die masi ha Khanapara namar kane ka jaka ka long tang ka jaka pynhap ia ki masi bad kam dei shuh ka iew kumba la kam da ki bor jong ka hima Mylliem namar ia ki masi la thied da ki bym dei ki nongotdoh masi.
Kum ka seng kala dep ban iakren bad ki bor jong ka sorkar ha kaba ia dei bad kane ka jingeh, ka dei ba ia ki masi kiba wan na sha bar ka tnad ri mrad jong ka sorkar ka peit bniah ia ki masi ban peit ba kin long kiba koit bad khiah bad kane kala pynlong ba ka jingthoh kaba ai da ki doctor kan long kum ka kynja shallan.
Kumba ka long ka bai musur ba ka hima mylliem ka shim na kawei ka masi ka long T.250 tyngka kawei ka masi, ka jingkiew dor jong ka masi ka long ba la bun ki nongthied kiba khlem dei ki nongdie masi dei na kane ka daw ba ka sorkar kala dawa na ka sorkar ba kan buh da ka dor kilo ia ki masi bad kan register ia ki nongotdoh ban iada na ki nongthied ban shallan masi sha Bangladesh la kynnoh u president ka KJBA.
