Shillong, Naiwieng 09: Ban pynpaw ia ka jingpyrshah ia ka sorkar jylla ba khlem siew ia ka tulop jong ki nonghikai SSA mynta la san bnai, mynta ka sngi ki nonghikai kiba dei na katei ka kynhun hapoh jong ka lama “Meghalaya SSA Schools Association” kila pynlong ia ka jingiaid paidbah bad pynkut da ka jingialang ha Madan Student ha Jaiaw, Shillong.
Haba kren ha kane ka jingialang u president ka MSSASA u bah Aristotle Rymbai u la kynnoh ba imat u myntri ka tnad pule u don ka jingartatien dei na kane ka daw ba ka sorkar Meghalaya haduh mynta kam pat siew ia ka tulop jong ki nonghikai kaba la sah san bnai.
U President ka seng u la ong ba ka daw jong ka jingiawan ka jong ki mynta ka sngi ha katei ka jingialang paidbah ka long ba kim pdiang ia ka jingkren jong u myntri ka tnad pule puthi ka jylla u bah Lahkmen Rymbui ha kaba u la ong ba ia mynta ka sorkar Meghalaya kam lah ban shim ia ki nonghikai SSA kum ki nonghikai ba pura ka sorkar.
Ka daw kaba ka sorkar kan nym lah ban shim ia ki kum ki nonghikai ba pura jong ka sorkar jylla ka daw ka long ba ka sorkar jylla ka shaniah ia ka tulop jong ki nonghikai SSA na ka jingbei pisa ka sorkar pdeng bad la ong ba ka jingdon jong ki ha ka shuki ka long ym ba kin pynkhein ia ki kyndon hynrei ban pynbeit ia ka tnad pule puthi ka jylla kitei kiei ki ktien ba la kren da u myntri ka sorkar Meghalaya la ong u bah Lyngdoh.
Haba ia dei bad ka tulop u myntri u la kren shai ba katba ka sorkar pdeng kam pat phah ia ka pisa ka sorkar kan nym lah ban leh ei ei hynrei ki hap ban ap, kitei kidei ki jingkren jong u myntri la kdew u bah Rymbai ha katei ka jingialang paidbah.
Kane ka jingwan jong ki ban ia lang mynta ka sngi ka long ban pyrshah ia ka jingkren u myntri ka tnad pule jong ka sorkar jylla, kane ka paw shai ba u myntri ka sorkar jylla ym don jingtip ei ei ha kaba ia dei bad ka RTE Act lane ia ki rule jong ka RTE, hato u mytnri um tip ia ku kyndon bala thoh.
Ki kyndon kiba ka sorkar kala pynkhein ia ki kyndon ka long ha kaba ia dei bad ka jingthung ia ki nonghikai SSA, katkum ki kyndon jong ka RTE Act bad RTE rule ia ki nonghikai SSA dei ban thung kum ki nonghikai ba pura jong ka sorkar hynrei ha Meghalaya baroh ki nonghikai SSA kiba don 12541 la thung kontrak ia ki da ki “School Managing Committee” hapoh ka State Implementation Society kane ka dei ka jingpynkhein kaba nyngkong.
Haba u snem 2014 ka sorkar pdeng kala thoh ia ka shithi sha baroh ki sorkar jylla bad Union Territory kala thoh shai kdar ba ki jylla ki don ban don ka juh ka kynhun nonghikai bad la khang ban buh la ka jong ka kyrdan namar ia ka jinglut jong ki ym bei da ka sorkar pdeng bad kane ka dei ka bynta kaba ar ba ka jylla Meghalaya kala pynkhein la kynnoh u President ka MSSASA.
U bah Aristotle la ong ba ka jingkren u mytnri ban ong ba ym lah leh ei ei lada khlem pat ioh ia ka pisa na ka sorkar pdeng kane ka jingkren u myntri ka long ka jingkren kaba ym lah ban pdiang la dawa ba dei ban shim noh ia kane ka tnad na u bah Lakmen bad u la kop ban khot ia ka jingiatyrko hapdeng u President bad u myntri haba ia dei bad ka SSA ban ia shai baroh.
Ha kane ka jingialang la dawa ba u myntri rangbah ka jylla u dei ban shim noh ia ka tnad pule na u bah Lahkmen hapoh artaiew namar ba u dei u myntri ka tnad pule jong ka sorkar jylla ba khlem don ia ka jingkit khlieh.
Ka tulop ia ki nonghikai ka long ba T.15,000/- ia ki nonghikai LP School bad T.20,000/- na ka bynta ki UP School bad kane ka dei ka jingkyrshan na ka sorkar pdeng bad naduh u bnai Iaiong 2021 ka sorkar pdeng kan shu ai grand bad ka jingkylli mynta ka long ka sorkar kala pynkhreh ne em ia ka jingmang pisa kaba kyrpang.
Ha kane ka sngi jan kot hajar ngut ki nonghiki kila ia wan na kylleng ka jylla ban ia shim bynta ha kane ka jingialang paidbah bad ia kane ka jingialang la kyrshan ruh da ka seng HYC ha kaba u president ka seng u bah Robert June u la ai jingkren ha kane ka jingialang paidbah.
