Shillong, Naiwieng 07: Ka Synjuk ki Nongsynshar Shnong ka Bri Hynniewtrep (SNSBH) kala phah da ka jingthoh sha u Myntri Rangbah ka jylla u Dr Mukul Sangma ban dawa na ka sorkar ba ka dei ban weng noh ia ka jingpynbna sorkar No. TCP/111/88/40 katkum ka tarik 13.01.1989.
Ha kane ka dorkhas kaba la ai sha u myntri rangbah ka jylla ka SNSBH kala ong ba ka sorkar hapoh ka jingialam jong u Dr Mukul kam shym la leh ei ei halor katei ka jingpybna sorkar kumba u myntri rangbah ka jylla u la kular ha ki dkhot ka seng ha ka jingiakynduh kaba la long ar sien ha ka 10.02.2016 bad ha ka 31.08.2016 ban wan ia ki lad ki lynti kiba thymmai.
Ha kane ka dorkhas kaba la ai sha u myntri Rangba, la ong ba ka jingialang jong ka Executive Committee jong ka Synjuk Ki Nongsynshar Shnong ka Bri U Hynniewtrep (SNSBH) ka kynhun kaba kyntup lang ia ki khlieh nongsynsahr shnong jong ka Ri Khasi bad Jaintia kila ia kren ha lor katei ka jingpynbna ka sorkar bad kum juh ia ki kyndon jong ka MUDA Bye-Laws.
Halor katei ka ain, na ka liang jong ka seng ka ong ba ia kane ka ain la pyntrei kam tang hapoh jong ka European Wards lane kata ka Normal Areas kaba don hapoh jong ka nongbah Shillong lyngba ka jingpynbna jong ka sorkar No. TCP/111/88/40 ha ka 13.01.1989 kala pyntrei kam pynban ha baroh kawei ka jylla.
Ia kane ka ain la leh tang lyngba ka jingpynbna jong ka sorkar bad ka dang sah haduh mynta khlemd a wanrah ia kano kano ka bill hapoh ka iing dorbar thawain jong ka jylla. Lah ban kdew hangne ba ia ka MUDA Bye-Laws kaba la pynmih ha ka jingpynbna No. MUDA. BPI/596/2011-12/8-A ha ka 5TH Nailar 2015; la buh teng shuwa ha dien ka jingiakynduh bad ka SNSBH bad ka sorkar ha ka 5.11.2015 bad na ka liang jong ka sorkar ruh kala pynmih ia ka khubor sorkar No. MUDA. BPI/596/2011-12/13-A ha ka 5TH Naiwieng 2015.
Hynrei da ka jingtuklar noh jong ka iing bisahr ba don burom ka Meghalaya High Court, ia ka jingpynbna sorkar No. MUDA. BPI/596/2011-12/8-A kaba la pynmih ha ka dated Shillong the 5TH Nailar 2015 la pynkylla da kaba pynmih ia kawei pat ka jingpynbna sorkar No. MUDA.188/255/2005-06/Pt/6A haka 16th Kyllalyngkot 2016 bad ia ka hukum jong ka sorkar kaba la ong ban buhteng la weng noh.
Haba ngat ha kum kine ki jingeh bad ki jingbym ia sngewthuh ia kane ka jingleh beain ban shan ia ka MUDA Byelaws kaba long sha bar jong ka jingpeit jong ka MUDA, na ka liang jong ka SNSBH ka ioh ban weng ia kane ka jingeh dei tang lada ka sorkar ka pynduh noh ia ka jingpynbna sorkar No. TCP/111/88/40 kaba la mih ha ka 13.01.1989 kaba lah ban wanrah ia ka jingpynlait ia ki paidbah na katei ka jingeh. Ka seng SNSBH ka kwah ba ka sorkar ka dei ban pynduh noh ia katei ka jingpybna sorkar, la ong u bah R L Blah Secretary ka SNSBH ha ka jingpynlait khubor mynta ka sngi.
