Shillong, Nohprah 12: Ki nonghikai skul SSA hapoh jong ka lama MSSASA mynta ka sngi kila pynlong ia ka jingiaid paidbah na Madan Iewrynhep sha additional secretariat ban dawa na ka sorkar ba ka dei ban siew noh ia ka tulop jong ki kaba la sah mynta la kot sha ka san bnai bad ka arrear kaba dang sah phra bnai.
Ha ka jingialang kaba long ha Additional Secretariat u Bah Aristotle Rymbai ha ka jingkren ka jong u la ong ba kum ka seng kala rai ban dawa na ka sorkar ba ka dei ban pynlait noh ia ka tulop jong ki bad ia ka arrear hapoh ka 20 tarik mynta u bnai bad lada ka sorkar kam lah ban leh ia kane kim ban sep ban ai da ka jingujor sha poh High Court.
U president jong ka MSSASA, u la ong ba katkum ka RTE Act, hapoh jong ka kyndon kaba san kala kren shai kdar ba ka sorkar jylla ka dei ban pynheh ia ka mang tyngka na ka bynta jong ki nonghikai lada jia ba slem ban phah pisa ka sorkar pdeng ka sorkar jylla kan dang lah ban siew ia ka tulup jong ki nonghikai. Ka jingleh bein jong ka sorkar Meghalaya ia ki nonghikai kam dei tang ia kiba hikai SSA hynrei ia baroh ki bym dei ki nonghikai skul sorkar.
Halor ka jingong ka myntri ba dei peit ia ka pule puthi ka Debora Marak ba kam lah leh ei ei namar ka bor ka shnong ha u myntri rangbah ka jylla, na ka liang jong ka seng MSSASA ka ong ba lada kam don bor kum ka myntri kala dei ban hiar shuki noh balei kan shong ha kato ka shuki lada kam don bor ia ka tnad ba ka bat.
U Bah Rymbai u la ong “ Ko Dr Mukul myntri rangbah ka jylla kane ka jingmih ki nonghikai sha surok kam dei shuh ka sien kaba nungkong, ne phi kwah ba ki nonghikai man ka por kin ia mih sha surok, ka seng kala ai da ka jingthoh ba ki kwah ban ia kynduh balei phim treh ia kynduh, kane ka kdew shai kdar ba phi niew poh ia ki nonghikai, phi long doktor kumno khlem ki nonghikai” u la ong.
Ki nonghikai baroh ha ka jylla kiba la shah thung kum ki nonghikai SSA ki don 12481, ka arrear kaba sah phra bnai ka long T.89 klur, ka tulop san bnai ka long 127 klur, ia ka pisa kaba la phah da ka sorkar pdeng sha ei ka sorkar kala pyndon kam, wat ialam bakla namar ia ka bhah jong u snem 2016-2017 ka sorkar pdeng kala dep ban phah bad ia ka bhah ba nyngkong jong u snem 2017-2018 kala dep phah bad kaba sah ka dei sa ka bhah kaba ar jong u snem 2017-2018.
