Shillong ,Naitung 14: Ka Khun Hynniewtrep National Awakening Movement (KHNAM) ka la byrngem ba kan nang pynjur ia ka jingia khih ha ki taiew ba dang wan lada ka sorkar jylla ka dang pynslem ban ai noh ia ki shithi thung sha ki jugali kiba dei hok ban ioh ia ka kam.
u Bah Thomas Passah haba ai jingkren sha ki lad pathai khubor ula ong, “Ngin iai ap haduh sngi ba ar kaba ngi la dep ban dawa ban ai noh ia ki shithi thung kam sha ki jugali shuwa ka 2 tarik u Nailur bad lada ka Meghalaya Energy Corporation Limited (MeECL) kam shim khia ia kane ka kam ngin sdang da ki jingiakhih ba khlem buh por.”
U Bah Thomas u la kynthoh jur ia u myntri ka tnat bor ding u Bah Sniawbhalang Dhar,ula ong “Lada ym lah ban shim ia ka jingkit khlieh kum u myntri ba dei peit ia ka tnat bor ding u dei ban ieh noh ia ka kam ba dei peit bad leit noh sha la ka jong ka konstitwensi”
Haba pynpaw ia ka jingbym shim khia ka tnat MeECL u Bah Thomas ula ong, “Lada ka MeECL ka kyrduh pisa balei pat ka pynmih ia ka post. Ki Jugali ki bym ioh ia ka shithi thungkam ki la pynlong ia ki jingiakhih da ka jingshong kyllain myngngor kaba ar sngi ha Parking lot hajan Additional Secretariat ban pynpaw ia ka jingsngew pyrshah ia ka sorkar halor ka jingslem ban ai noh ia ka shithi thungkam sha ki 466 ngut ki Jugali.
Ka MeECL ka la pynpaw ban thung kam noh ha ki 3 tylli ki phase kumba 336 ngut hapoh ka Phase I bad 233 na ka bynta ka phases II bad III. Hynrei ka jingthung kam na ka bynta ka phase II bad phase III ka MeECL kam pat lah ban thung kam haduh kine ki sngi. “Ngi la dep ban pynkhreh ban buh noh da ka jingkyrpad sha ka High Court ba kan iarap tuklar lem halor ka jingeh jong ki khynnah samla lada ka MeECL kam lah ban leh eiei halor ki jingdawa ”,la ong u Bah Thomas u president ka KHNAM Shillong Youth Wing.
