Shillong, U nongialam ka liang pyrshah u Dr Mukul Sangma mynta ka sngi la ong ba ka sorkar ka dei ban phah tokit ia ka kam khaii beain ia u dewiong katkum ka jingbethah jong ka Lokayukta bad ka sorkar kam dei shuh ban dang pynslem.
U Dr Mukul u la ong ba ka jingdawa jong ki paidbah ha kito ki por ka long ba dei ban don ia ka ain ha ka Ri India baroh kawei ban tehlakam ia ki kam bamsap bad ka jylla Meghalaya ka dei kawei na ki jylla kaba la don ia kane ka ain katkum ka jingangnud jong ki paidbah bad kane ka ain ka teh ruh wat ia u mytnri rangbah jong ka jylla.
Haba phai sha ka rai jong ka Lokayukta ka long ba dei ban phah tohkit ha ka CBI ia kaba ka sorkar haduh mynta kam pat aiti haduh mynta, u tei u nongialam ka liang pyrshah u la ong ba lada ka don ka jingpynslem ka thew ba ka don ka jingthmu ban pyndam ia ki sabut.
U Myntri rangbah ba rim ka jylla u ba dei ruh u nongialam ka liang pyrshah u la ong ba un nym lah ban shu sngap jar ia kane ka jingleh jong ka sorkar, ka sorkar kala dei ban aiti noh mar dor ia kane ka jingtohkit katkum ka jingbethah jong ka Lokayukta bad ia kito kiba don kti ka ain kan leh ia kaba don kam.
La ong ruh ba lada don kano kano ka jingpyndom ia ki sabut kito ki ophisar kiba ia don kti lang kin nym lah ban lait ia ki kyndon jong ka ain. U la ong ba ai ka sorkar kan phah ia u briew jong ki bad ki ophisar ba dei peit ryngkat ki lat pathai khubor ban leit jurip hato don shisha ne em u ta u dewiong ha madan 32 lak metric tone.
