Shillong, Jylliew 20: U Bah BS Mawphiang u wei na ki nongkit kam ba rim jong ka Western Ri Bhoi Dorbar u la kren bynniaw ba ka jingbym ioh ia ka Patharkhamah Civil Sub Division ka dei na ka jingbym kit khlieh ki nongmih khmat u la kynnoh.
La ong ba ka na ka liang jong ka shnong kala dep ban ai ei wat ia ka jaka ban shna ia ki ophis na ka bynta ka Civil Sub Division bad u Deputy Commissioner jong ka Ri Bhoi District ruh u la dep ban wan jurip ia kane ka jaka bad ka jingangnud jong ki paidbah ka long ban ioh ia ka Civil Sub Division na ka bynta ka Roi ka par jong kane ka thain kaba dang sah dien.
Ia ka Patharkhamah Adminstrative Unit la plie da u myntri rangbah ba rim ka jylla u SC Marak ha ka 5th Naitung 1995 bad kane ka Adminstrative Unit ka dang trei kam haduh mynta. Ki paidbah ka thain ki da kwah eh ban ioh ia ka Civil Sub Division namar kane ka jaka kala jngai kumba 80 km na ka headkwater jong ka Ri Bhoi District, Nongpoh.
La ong ba ha Patharkhamah kila don bun ki ophis sorkar, naduh ki College, ka police Station, ka CHC, ka Block bad bun kiwei kiwei ki ophis bad na ka bynta ka Ri Bhoi Sepngi kala dei kaba don kam ban ioh ia ka Civil Sub Division. Kum ki riew rangbah ka thain kila leit ban pynsngew na ka por sha ka por ia kane hynrei ka long tang kum ka jingleit iathuh khana pynban la ong u Bah BS Mawphniang.
