Shillong,Nailur 04: Ki 10 ngut ki samla pule doctor na ka jylla kiba ioh leit pule na ka bhah sorkar ki la shah kyntait ban ioh rung ha ki jaka pule doctor jong ka jylla Assam, ki la ong ba kin pynlong da ka jingiakhih da kaba shah thngan naduh la shai ka sngi.
U samla Iaisanbha Khyllep u samla pule medical haba kren ha ki nongthoh khubor ula iathuh,ka sorkar jylla shuwa ba kan phah ia ki samla pule shabar jylla ka dei ban tip shuwa ban phah leit pule ia ki samla hynrei ka sorkar ka la shu phah khlem ka jingtip ka ktah bha ia kiba leit pule.
U la ong, ngim don lad shuh shawei ban leit pule namar ka por ban ioh rung kolej ha kiwei pat ki kolej ka la jan kut bad ngi la pyrshang ban leit ia kynduh ia ki heh sorkar kiba dei khmih ia kane ka kam hynrei ki la pynpaw ba kim lah ban leh eiei.
“Wat lada ka sorkar ka pynthame ia ngi ba kan ia khun noh da ka mukotduma pyrshah ia ka Assam medical college hynrei ngi ki samla pule ngi sah ha ka umdum ngim tip shuh ban leh kumno namar ha ka jingiakhun mukotduma ngim tip la ngin jop ne rem” ula ong.
“ Ngi dawa na ka sorkar ba ka dei ban leh eiei halor ka jingeh jongngi namar ngim kwah ba ka por jongngi kan shu sepei nalor ba ngi la trei shitom bha ban ioh leit pule”,la ong u samla Iaisanbha.
“Lada ka sorkar kam lah ban leh eiei halor ka jingshah kyntait ban ioh leit pule ngi la rai ban leit ujor sha ka iing kashari ban tuklar lem halor kane ka jingeh jongngi”,la bynrap u samla Iasanbha Khyllep
U samla Jerimaia D Sangma ula ong,ka dei ka jingbakla ka sorkar ba ka la phah pule khlem da wad jingtip kumta ka sorkar ka dei ban siew ia ka bai lut ksan iangi.
