Shillong, Naitung 08: U myntri rangbah ka jylla Meghalaya u Conrad K Sangma u la phah ia ka khubor sngewlem halor ka jingkhlad noh u nongialam ka seng sain pyrthei u ba dei ruh u president ka Dravida Munnetra Kazhagam (MK) U Kalaignar Muthuvel Karunanidhi. Ia kane ka khubor sngewlem la phah ha ka kyrteng ki paidbah jong ka jylla Meghalaya.
Ha kane ka khubor sngewlem kaba la phah sha u Working president jong ka DMK u ba dei ruh u khun u MK Stalin, u la ong ba u Karunanidhi, nongseng ia ka party DMK u la ong u ba u la dei u nongialam seng sain pyrthei ba la slem bha bad u la leh bun ki kam na ka bynta ki jaidbynriew Tamil bad kum juh ha ka Ri hi baroh kawei ha kiba bun ki liang, la ha ka thoh katar, ne ha ki kam ialehkai.
U myntri rangbah jong ka jylla Meghalaya u la ong ba ki paidbah kin kynmaw kyrpang ia u ne u nongialam halor ka jingialeh ka jong u ba ki sorkar jylla ki dei ban don ia la ka jong ka bor ha ka jingsynshar kaba don ruh ia ka sorkar pdeng.
U Conrad u la pynkynmaw biang ia ka histori ba dei u Karunandhi, u ba la ia khun bor bah ia ka hok jong ki myntri rangbah jong kai jylla hapoh jong ka Ri ba ki myntri rangbah jong ki jylla ki dei ban ioh ia ka hok jong ki ban kyntiew ia la ka lama jong ka Ri India ha ka sngi leh burom ia ka sngi laitluid jong ka Ri.
U Conrad ha ka shithi sngewlem ka jong u la ong ba u da sngewsih shisha halor kane ka jingkhlad noh une u nongialam seng sain pyrthei u Kalaignar Muthuvel Karunanidhi. U duwai ba ai ka mynsiem jong u ne u riew khraw un ioh ia ka jingjahthiat bym juhkut, la ong u Conrad K Sangma.
