Shillong, Risaw 24: U Bah J A Lyngdoh Vice President jong ka seng BJP Meghalaya State Unit mynta ka sngi u la ther kylla ia ki nongialam jong ka seng Congress kiba la kwah ban pynkylla ia ka bhah kyrpang jong ki rit paid.
U bah JA Lyngdoh u la ong ba dei u nongialam jong ka seng Congress u Manish Tiwari u ba la ong ba la don kam ban wanrah ia ka jingkylla ha ka jingbhah kam kyrpang ia ki rit paid ha ka Ri India.
Haba ia dei bad ka jingkynnoh jong u bah RV Lyngdoh ba dei ka seng BJP, na ka liang jong ka BJP ka dawa ba u tei u myntri jong ka sorkar jylla Meghalaya u dei ban sei ia ki sabut ban pynshisha.
Kane ka jingleh jong ka seng Congress ban wad ia ki buit ba la ai phew jait ban pynthoh bria ia ka seng BJP namar ka tip shai kdar ba ki paidbah jong ka jylla ki la ngiah ia ka seng Congress, namar la thikna ba ha ka tiaew ba nyngkong jong u bnai Nohprah ki MLA jong ka seng Congress kin phet na ka party Congress.
Na ka liang jong ka BJP ka pynshai paidbah ba kum ka party kam don kano kano ka jingthmu ban wanrah ia ka jingpynkylla ha ka bhah kyrpang ia ki Rit paid ha ka Ri, na ka liang jong ka BJP ka dang kwah ban pynkhlain shuh shuh ia ki Rit paid hapoh jong ka Ri ha kaba ia dei bad ka bhah kyrpang na ka bynta jong ki.
Haba ia dei bad ka niam ka rukom ka BJP kam shym don kano kano ka jingkhang baroh ki briew ki ioh ban mane lait luid ia kaba ki kwah, dei ka sorkar BJP kaba la phah ia ki nongmih khmat jong ka Ri India sha Vatican ban ia don bynta lang ha ka sngi ban pynkyntang Riew khuid ia ka Mother Teresa.
U Bah J A Lyngdoh u la ong ba ka Congress ka dei ban sngewthuh ba ki paidbah mynta kila sngewthuh ha kaba kin nym lah ban ialam ba kala ia ki paidbah, la sor ne nongkyndong ki paidbah ki tip ia ka jingshisha. Ka BJP ka don tang ia kawei ka sur kata ka long ban trei na ka bynta ka roi ka par jong ka Ri bad ka jylla hi baroh kawei.
