District council , ka State Govt bad  Governor Babu Kular Khongjirem

Ka jingiakhun mynta hapdeng ki lai tylli ki bor synshar ha ka jylla jong ngi ka itynnad bha. Ki ju ong haba iakhun ki hati,  iap ei pynban ki phlang (paidbah)ki bym tip ia ka duh ka dang ne ka bneng ka khyndew.

Ka jingkhyllem ka EC jong ka UDA hapoh ka KHADC ka la wan rah ka thma kaba itynnad ba ki iapyni la ki jong ki jong ki nia ne nongrim ban pynksan jubor ia la ka jong ka nongrim la kum ki matlah Hindustan hyndai. U Chairman bad u CEM ba mynta ki ong ba ki iaid katkum ki kyndon ain ban pynkhyllem ia ka EC barim bad thaw thymmai da ka EC jong ka kynhun thymmai  UDF. Ki ioh mynsiem ba ia shah matlah u Governor da kaba iaid lait ia ki bor pyniaid jong ka sorkar jylla. Hynrei, ka jingkmen tohhoh jongki kam poi  shaei shaei ruh namar ka thma hapdeng u Governor bad ka sorkar jylla ruh ka dang iaid shakhmat mynta.

Ka jingkyntait jong u Governor ia ka jingai jingmut jong ka state govt ka pynbitar bha ia kane ka MDA govt hapoh ka jingialam ka NPP. U Lat um shah binding ne um sngap satia ba ka dei tang recommendation jong ka state govt khlem da rai tikna da ka cabinet. Jin lada ki rai officially da ka Cabinet meeting bad phah sha u Lat, u Lat um nud satia ban lehkai namar ka rai jong ka cabinet meeting kan long binding ia u Lat bad u dei ban sngap beit ia ka cabinet meeting.

Ka recommendation jong ka sorkar sha u Lat ka dei ka recommendation jong ka cabinet, Ka sorkar MDA lada ka kwah shisha ba u Lat un pyndem, ki dei ban ia rai beit da ka Cabinet meeting ym ban shu ai jingmut lymmuh lynmain ne ban shu bam jakhluid haduh u Lat ruh um salia.  Sa kawei pat ka long ba, ka dei ka jingshisha ban pynduh noh ia ka tnad District Council Affairs kumba ong u Dy. Chief Minister namar lada ka District council ki iaid direct sha u Lat bad u Lat ruh u iaid direct sha District Council, kam don jingmut shuh ka tnad DCA.

Hynrei ka state govt ka dei ban tip bad sngewthuh shai hangne ba ka lynti Iaid (channel) jong ka District Council bad u Lat ka dei lyngba ka office u Deputy Commissioner, East khasi Hills. Hato ka kham heh ka office DC ne ka Dept jong ka DCA? Kumno ka office DC ka nud ban iaid lait ia ka state govt haba baroh ki DC ki long hapoh ka jingpyniaid ka state govt? U governor ruh u thoh sha ka DC ban pynlong kam ia ka New EC bad u Chairman ka KHADC ruh u la thoh lyngba ka Office DC sha u Lat. Ka sorkar MDA ka dei ban peit bha ioh don kano kano ka Jinglait (leakage) ka procedure namar haduh mynta kam pat aiti ha ka synshar u Administrator ban pyniaid ka DC ia ka administration ha KHADC.

Sa kawei pat ka jingeh jong kane ka EC ba thymmai mynta ka long ba kane ka EC ka kwah ban bud dien ia ki kam bad ki ain kiba biang ba la passed da ki EC barim. Kata ka biang. Tangba ka jingangnud bad jingphoh sniew jongki ka jngai bah na kaba ki thmu. Ha ia mutdur seh haba ka EC barim ba ialam  sorkar lang da kijuh ki party ba pyniaid ia ka state govt bad ha KHADC ruh kumjuh ki dang sah pongding (pending) lut baroh ki kam bad ki ain la ka dei ha ka sorkar bad office u Lat, kumno ngin khmih lynti ia kane ka EC kaba mynta ba ka state govt kan shimkia ia ki kam bad ki ain jongka namar ki ia kylla nongshun iwei iwei pat. Bakla tiak, wat ka bhah shuki EM ruh kin pynslem khnang da ki bnai bad u CEM ba thymmai un pyniaid hi marwei ha KHADC khlem ioh jingmynjur ia ki EM jongu lada u dei iaid lyngba ia ki bor ka sorkar jylla.

Dang bun ngin iatai, hynrei ka jrong eh ka phang, Lada Ka UDP bad NPP ki kwah shisha ban pynjah noh ia kine ki kynrum kynram ha KHADC, ki dei ban pynkloi noh ka bye election MDC na Ranikor (Langrin) bad hadien kata weng noh shwa ia u Chairman (remove) uba dei u shiah ba shyrkhei ha District Council, tang katta, ka la suk shwa ka pyrthei ia mynta shi por (for the time being in force).

What Next?

Recent Articles

Leave a Reply

Submit Comment

*