Don katto katne ki nongialam seng bhalang kiba don bynta ha ki kam trei benami: HNLC

Shillong, Lber 31: U general secretary jong ka seng HNLC u bah Saiñkupar Nongtraw ba dei ruh u nongphah ktien katei ka seng lehnoh kaba la niew beain da ka sorkar, u la kam ba kum ka seng ka la ioh jingtip ba don bun bah ki briew kiba trei ia ki kam benami naduh ki polirtician, ki babu sorkar bad kum juh katto katne ki nongialam seng bhalang.

Ha ka kyrwoh kaba la phah da u Sainkupar Nongtraw sha ki lat pathai khubor la ong ba ka seng kala shem ba ki nongkhaii na sha bar ka jylla kila pyndon kam ia nongkhaii na kane ka jylla ban trei ia ki kam khaii beanami ban lait na ka jingsiew ia ka khajna kamai kaba ki dei ban siew.

Ka HNLC ka kynnoh ba bun na ki karkhana ha kane ka jylla kum ki karkhana dewbialt, ki karkhana thang dewiong kiba bun dei kiba pyniaid benami da ki briew kiba na sha bar kum ka seng kala ioh ia kane ka jingtip na kiba bun ki lat lum jingtip katei ka seng.

Ka seng kala kynnoh ba ki don ki briew kiba leh ia ka kam ban pynioh ia ka jingbit na ka Single Window Agency bad ki don ki nongkhaii na sha bar ka jylla kiba thep ia ki kam ki jam ha ka kyrteng ki trai yjlla ha ki kam kontrak. U General Secretary  ka seng HNLC u la kynnoh ba jan baroh kiba ia trei benami, la ka long ha ki kam kontrak, kam supply mar.

U General secretary ka seng HNLC u la kam ba kum ka seng kala ioh jingtip ba ki don katto katne ki nongialam seng bhalang kiba don bynta ha ki kam trei benami bad kane ka long kaei kaei kaba sngewsih ban tip ba kin don kum kine ki nongialam seng, kumba ka long na ki 34 tylli ki karkhana thang dewiong ha Jaintia Hills hapoh ki san bnai 14 tylli kila ioh jingbit.

La kynnoh ruh ba bun na ki tnad sorkar bapher bapher kila kylla long ki jaka shna pisa da ka jingdon katto katne ngut ki ophisar, ka jylla kala don ia ka Meghalaya (Benami Transactions Prohibition) (Amendment) Bill, 2018 ia kaba la wan rah ruh ia ka jingkylla  Ha ka  Meghalaya (Benami Transactions Prohibition) Act, 1980 (Meghalaya Act No 24 of 1980) da kaba pynrung ia ka kyndon 2 (e) bad ka kyndon  2 (f).

Kala don ka jingthmu ruh ban wanrah ia ka jingpynkylla ia ka Sub-section (1) jong ka kyndon kaba  4 jong ka Meghalaya (Benami Transactions Prohibition) (Amendment) Act, 2016 of Act No. 4 of 2016, kane ka jingthmu ka long ban ailat ia ka sorkar jylla ban kan thung ia ka committee lada don kano kano ka jingujor.

Ka  Meghalaya (Benami Transactions Prohibition) (Amendment) Act, 2016 kaba la pdiang da ka sorkar ba ka jingthmu ka long ban don ia ki kyndon ban iada na ka jingwan rung kyrthep ki briew ba nabar sha kane ka jylla hynrei kumba ka long haduh mynta kane ka ain ka dang long khlem bniat, la ong u bah Saiñkupar Nongtraw General secretary cum Publicity secretary,HNLC ha ka kyrwoh.

 

 

 

 

What Next?

Recent Articles

Leave a Reply

Submit Comment

*