Shillong, Jymmang 23: Ka jingialap elekshon shiteng samoi hapoh Ampati katba dang jan ki sngi kala dang shongshit ha kaba ki nongialam jong ki seng riewlum, ka UDP, PDF bad HSPDP kiba ia don lang ha ka sorkar MDA kila leit ban ialap na ka bynta u Clement G Momin kyrtong ka NPP.
Ki nongialam jong ki seng riewlum kiba la leit sha Ampati ban ai ka jingkyrshan ia u kyrtong ka party NPP, ki long u Bah Kyrmen Shylla myntri ka sorkar na ka seng UDP, u Bah Banteidor Lyngdoh na ka PDF myntri ha kane ka sorkar bad u Bah Renikton L Tongkhar na ka party HSPDP u ba dei u MLA jong ka Mawkyrwat.
U MLA shimet na ka Nongkrem Konstitwensi u Bah Lambor Malniang u ba dei ruh u Chairman jong ka state Planning Board u la leit sha Ampati ban ialap elekshon na ka bynta u krtong ka seng NPP. Nalor kine ki nongialam jong seng kiba ia don lang ha ka sorkar ki nongialam ka NPP na Khasi Hills ruh kila hiar sha Ampati ban ialap naka bynta u kyrtong ka party.
Ha ka jingialap elekshon jong kine ki nongialam seng riewlum kila kren ia kawei ka sur ba kane ka sorkar hapoh ka jingialam jong u Conrad K Sangma u nongialam jong ka NPP kan neh san snem lynter bad kila ong ba ka jingkam jong ka Congress ba kane ka sorkar kan khyllem ha dien ka election shiteng samoi ha Ampati ka dei ka jingmutdur jong ka seng Congress, la ong u Bah Renikton L Tongkhar.
Ha ka jingkren jong u Bah Hamletson Dohling nongialam ka seng PDF u ba dei ruh u myntri ha kane ka sorkar MDA, u la ong ba kane ka election ka long kaba kongsam ym tang ia ka seng NPP hynrei khamtam eh ia ka sorkar MDA, u la kyntu ia ki paidbah ba kin ai ka jingkyrshan ia u Clement G Momin ban ioh ia ka jingjop.
